Ушул жуманын башында башкы имараттын фойесинен экинчи кабатка көтөрүлүүчү тепкичтин каршысындагы тээ имарат курулгандан бери турган эски, жепирейген жыгач терезелерди заманбап, темирден жасалган чоң терезелерге алмаштыруу иштери аяктап, терезенин ортоңку бөлүгүндөгү айнекке университет ысымын алып жүргөн Жусуп Баласагындын чоң сүрөтү тартылып, “Кут билимден” алынган учкул сөздөрү жазылды. Ал эми окуу жайдын түндүк тарабында жайгашкан окуу имараттарынан, жатаканалардан башкы имаратка карай келген жолдун бир бөлүгүнө брусчатка жаткырылып, анын эки тарабындагы какырап, бош жаткан жерлерге арча, туянын көчөттөрү отургузулду жана газон чөбү себилди.

Эскерте кетсек, буга чейин башкы имаратка кире бергендеги фойенин чыгыш жана батыш тараптарына студенттер үчүн эс алуу зоналары жасалып, ал жерге ыңгайлуу отургучтар менен журнал столдору коюлуп, айланасы ар дайым жашыл болуп туруучу фикус дарактары жана гүлдөр менен кооздолгон.

Албетте, бул жасалган жумуштар көбүртүп-жабыртып, жарыя кылуучу деле чоң жаңылык эмес. Ушундай болушу керек болчу! Бирок, буга чейин мындай нерселер жасалбай, жок болгондуктан, бул өзгөрүүлөрдү байкабаган же башка окуу имараттарында окуп, иштеген студенттер, кесиптештер, о.э. Улутттук университетти сындаганды жакшы көргөн блогерлер үчүн кыскача маалымат берип коюуну туура көрдүк.