2025-жылдын 9-июнунда Жусуп Баласагын атындагы Кыргыз улуттук университетинин 100 жылдыгына жана Алыкул Осмоновдун 110 жылдыгына карата кыргыз филологиясы факультетинде белгилүү жазуучу, КРнын мамлекеттик сыйлыгынын лауреаты, филология илимдеринин доктору профессор Советбек Байгазиевдин “Алыкул Осмонов – кыргыз поэзиясынын чолпону” аттуу жаңы китебинин бет ачарына арналган тегерек үстөл болуп өттү.
Советбек Байгазиевдин “Алыкул Осмонов – кыргыз поэзиясынын чолпону” аттуу китеби — кыргыз поэзиясынын классиги Алыкул Осмоновдун чыгармачылыгын, руханий дүйнөсүн жана поэтикалык мурасын терең изилдеген олуттуу эмгек.
Бул китепте автор –
- Алыкул Осмоновдун өмүр жолу жана поэтикалык тагдырын кеңири чагылдырган;
- Анын поэзиясындагы темалар — сүйүү, улуттук рух, жаратылышка суктануу, жалгыздык жана ойлордун тереңдиги тууралуу терең анализ берген;
- Алыкулдун чыгармачылык стили, көркөм тил өзгөчөлүктөрү, ырларынын философиялык мазмуну талданган;
- Кыргыз адабиятындагы орду, анын мурасы кийинки муунга кандайча таасир эткени баяндалган;
- Ошондой эле поэзиясын дүйнөлүк адабият менен салыштырып караган учурлар да бар.
Китеп окурмандарга Алыкулдун ыры менен жашоосунун айкалышын, анын ички дүйнөсүнүн драмасын жана акындык генийин терең түшүнүүгө мүмкүнчүлүк берет. Бул эмгек — адабият таануучуларга, студенттерге, мугалимдерге жана кыргыз поэзиясына кызыккандарга баалуу китеп.
Иш-чарага белгилүү окумуштуулар жана коомдук ишмерлер: педагогика илимдеринин доктору, профессор Сулайман Рыспаев, Жеңиш Чыманов, профессор Бектурсун Байсабаев, А.Осмонов атындагы коомдук үйдүн директору Памир Казыбаев сыяктуу инсандар катышып, китептеги өзгөчөлүктү талкулашты.
