2023-жылдын 13-май күнү башкы имараттагы санариптик технологиялар борборунда “Кыргыз адабияты, котормо иши жана билим берүүсү Улуу Ата Мекендик согуш жылдарында” аттуу ЖОЖдор аралык студенттик илимий-тажрыйбалык конференцияда мыкты баяндама жасаган студенттерге дипломдорду тапшыруу аземи болду. Иш-чараны кыргыз филологиясы факультетинин деканы Бактыбек Жайлообаев ачып, аталган конференциянын пленардык отуруму 20-апрелде чоң жыйындар залында, ал эми секциялык отурумдары жагдайга байланыштуу (эвакуация) онлайн түрүндө болуп өткөнүн, бүгүн болсо ошол конференциянын жыйынтыгы чыгарылып жатканын билдирди жана мыкты баяндама жасаган студенттерге дипломдорду тапшырүү үчүн сөз кезегин КУУнун ректору Төлөбек Абдырахмановго берди. 

Ректор конференцияга катышкан студенттерге, алардын илимий жетекчилерине чоң ыраазычылык билдирип, эки сунуш айтты: "Биринчиси - конференцияда айтылган кошумчалар, толуктоолор жана сын-пикирлерди эске алуу менен жетекчиңер менен баяндамаңарды дагы бир жолу карап чыгып, даярдап берсеңер, биз аларды атайын жыйнак кылып чыгарып беребиз. Экинчиси - Улуттук университет жөнүндө эссе жазып берсеңер: окуу жай жөнүндө эмне ойлойсунар, эмнеси жагат, эмнеси жакпайт, кааласанар эже-агайлар жөнүндө, кызматкерлери жөнүндө. Жаңылануу үчүн силерден да пикир керек, кайдыгер болбогула". Ректордун сунуштарын жыйындын катышуучулары дүркүрөгөн кол чабуулар менен тосуп алышты. Андан кийин Төлөбек Абдырахманов “Кыргыз адабияты, котормо иши жана билим берүүсү Улуу Ата Мекендик согуш жылдарында” аттуу ЖОЖдор аралык студенттик илимий-тажрыйбалык конференцияда мыкты баяндама жасаган студенттерге жана алардын илимий жетекчилерине дипломдор менен сертификаттарды тапшырды.

Жыйындын соңунда студенттердин илимий жетекчилери чыгып сүйлөп, Кыргызстан эгемендүүлүктү алгандан бери согуш жылдарына кайрылган темалар болбогондугун, башкаларга салыштырганда мыкты иш-чара өткөрүлгөндүгүн белгилеп, уюштуруучуларга жана Улуттук университеттин жетекчилигине ыраазычылык билдиришти. 

• Сыйлангандардын тизмеси