2023-жылдын 14-15 март күндөрү педагогика факультетинин деканы Р.Т.Сулайманова жана доцент Т.Ч. Абдылдаева М.Х.Дулати атындагы Тараз мамлекеттик университетинде өткөрүлгөн КПИАнын академиги, п.и.д. К.Ж.Бузаубакованын 60 жылдык мааракесине арналган “Үзгүлтүксүз педагогикалык билим берүү: инновациялык парадигма, технология жана методика” аттуу эл аралык педагогикалык окууларга, ошондой эле “Аралыктан билим берүү: заманбап тренддер жана стратегиялар” аталышындагы илимий конгресске катышып, пленардык баяндама жасашты. Иш-чаранын жүрүшүндө Ж.Баласагын атындагы КУУнун ректорунун атынан юбилярга куттуктоо катын тапшырышты.

Россия, Өзбекстан,Кыргызстан,Түркия, Казакстандын окумуштуулары катышкан конференция эки күнгө созулуп, илимий баяндамалар төмөндөгү үч секцияда талкууланды:

1. “Санариптик коом: санариптик окутуу технологиялары жана мугалимдин инсандыгы”

2. “Аралыктан  билим берүү: заманбап тренддер жана жаңы мүмкүндүктөр”

3. “Санариптик чөйрөдө педагогикалык кадрларды заманбап даярдоонун тенденциялары: улуттук баалуулуктар, ааламдык тажрыйба, инновациялар”.

Иш-чаранын жыйынтыгында Ж.Баласагын атындагы КУУнун педагогикалык факультети жана М.Х.Дулати атындагы Тараз мамлекеттик университетинин “Устаз” институту, педагогика кафедрасынын ортосундагы көп тараптуу кызматташуу боюнча пландар белгиленди.

Тамара Абдылдаева – педагогика факультетинин доценти