2023-жылдын 17-март күнү №10-окуу имаратында юридикалык колледждин эмгек жамааты тарабынан улуттар аралык ынтымакты чыңдоо жана бекемдөө, жаркыраган жаз майрамы Ноорузду көңүлдүү маанайда тосуу максатында “Кут толгон Нооруз майрамы” аттуу фестиваль өткөрүлдү. Чоң программадагы маданий иш чарада окуу жайдын студенттери Манас айтып, комуз менен ооз комузда ойноп, ыр-бийлерди аткарып, ар улуттун бийлерин тартуулашты. Юридикалык колледждин эже-агайлары менен студенттерин күн менен түн теңелген чыгыш элдеринин Жаңы жылы менен ректораттын жана жеке өзүнүн атынан КУУнун ректору Төлөбек Абдырахманов куттуктап, окуу жайдын жетекчилигине, иш-чаранын уюштуруучуларына, мугалимдерине, кызматкерлерине, о.э. макул болуп катышып, аралашып жаткан студенттерине чоң ыраазычылык билдирди.

Ректордун айтымында, "Өзүбүзгө өзүбүз майрам кылсак - жашоо майрам болот; өзүбүзгө өзүбүз проблема түзүп, трагедия кыла берсек - жашоо да ошондой болот". Андан ары ректор студенттерге кайрылып, "Кээде, окуу жайдын жетекчилиги уюштура албай калышы мүмкүн. Ошондо деле өзүңөр үчүн өзүңөр иш-чараларды уюштуруп тургула. Студенттик кез бат эле өтүп кетет, анан өкүнүп каласынар. Спорт боюнча, өздүк чыгармачылык боюнча майрам уюштуруп турсаңар, өзүңөргө жакшы болот. Мындан кийин ушундай иш-чарарды уюштурсаңар, кайрылгыла, кол кабыш кылабыз. Ушул жазда баарыңарга жакшылык каалайм, каалаган ой-тилек, максатынарга жеткиле. Аман болгула, ден-соолукта болгула, бөөдө кырсыктан сырткары болгула. Дагы бир жолу майрамыңар кут болсун!", - деди.

Фестивалдын жүрүшүндө о.э. улуттук тамак-аштар көргөзмөсү уюштурулду.

Майрамдык иш-чарага илимий иштер боюнча проректор Назаркул Ишекеев, административдик-чарба иштери боюнча проректор Бакыт Айтахунов,  инновациялык жана стратегиялык өнүгүү боюнча проректор Ирина Дмитриенко жана юридикалык колледждин директору Сабырбек Турусбеков катышты.