2023-жылдын 16-март күнү кечинде №5-жатаканада жашаган студенттер Нооруз майрамын утурлай "Сармерден" оюнун өткөрүштү. Улустун улуу күнүнө арналган иш-чарага Жогорку Кеңештин депутаттары Нуржигит Кадырбеков, Винера Раимбачаева, КУУнун ректору Төлөбек Абдырахманов, административдик-чарба иштери боюнча проректор Бакыт Айтахунов жана журналистика факультетинин деканы Ширин Костюк катышты. Жатаканада жашаган шайыр балдар менен кыздар бабалардан калган улуу мурасты улап Манас айтуу, ыр-бийлерди аткаруу, макал-лакап, жаңылмачтарды кайталоо, табышмак табуу боюнча жарышып жатканда, ашпозчулукка  шыгы бар студенттер ошол эле жерде сүмөлөк кайнатып, аш бышырып жатышты. 

Оюн аяктаган соң, иш-чаранын кадырлуу меймандары чыгып сүйлөшүп, студенттерге каалоо-тилектерин айтышты. Нуржигит Кадырбеков студенттердин аткаруусундагы "Сармерден" чет өлкөлөрдөн келген жылдыздардын концертинен да кызыктуу өткөнүн, Винера Раимбачаева жаштар үчүн жакшы мыйзам долбоору даярдалып жаткандыгын билдирсе, Төлөбек Абдырахманов Жогорку Кеңештин депутаттарына, оюндун уюштуруучуларына ыраазылык билдирип, жатаканада жашоонун эң кызыктуу күндөрү өтөөрүн, бир туугандан да жакын болгон достор табылаарын айтып, студенттерге ынтымакта жашоону, билим алуу менен бирге башка мүмкүнчүлүктөрдү да ачып, бөөдө кырсыктан алыс, ден-соолукта болуп, ата-энелердин, Кыргызстандын үмүтүн актаган жакшы студент болуп, келечекте жакшы инсан болуп чыгууну каалады.

Концерттик программадан кийин жатакананын жетекчилери менен студенттер келген меймандарды даам ооз тийип кетүүгө чакырышты.