2023-жылдын 14-мартында «Aрр IT Company» компаниясынын мүдүрү жана негиздөөчүсү Турат Алыбаев; компаниянын негиздөөчүсү Азамат Акматов жана компаниянын башкы программисти Элдияр Алмазбек ИВТ багытынын студенттери үчүн «Flutter аркылуу мобилдик тиркеме кантип жасалат жана эмнеси менен өзгөчө» аттуу мастер-класс өткөрүштү. Алар аталган фреймворк боюнча презентация көрсөтүшүп, Флаттерди окуп үйрөнүү жана анын жардамы аркылуу iOs, Android аракеттер системалары үчүн кроссплатформалык мобилдик тиркемелерди иштеп чыгуу боюнча баяндама жасашты жана өздөрүнүн тажрыйбалары менен бөлүшүп, бул тармакта эффективдүү өнүгүү боюнча кеп-кенештерин беришти. Ал эми Элдияр Алмазбек студенттерге Android үчүн мобилдик тиркемени иштеп чыгууну көрсөттү.

Мастер-класс жогорку денгээлде өтүп, студенттер көптөгөн суроолорду берип, абдан активдүү катышышты. Алар компаниянын өкүлдөрү маалыматты абдан жеткиликтүү жана кызыктуу беришкенин белгилешти.

Сабактын соңунда компаниянын өкүлдөрү тест-суроо жүргүзүшүп, анын жыйынтыгы менен ИВТ-21 группасынын студенти Кубатов Эрболго Flutter-де мобилдик тиркемелерди жасоо курсуна акысыз окууга сертификат беришти. Бул окутуу курсу 6 айга созулат.

Маалыматтык жана инновациялык технологиялар факультетинин жетекчилиги жана «Информатика жана эсептөөчү техника» кафедрасынын окутуучулар жамааты «Aрр IT Company» компаниясынын кызматкерлерине кызматташкандыгы жана кафедранын студенттерине жаны маалыматтарды бергендиги үчүн терен ыраазычылык билдиришет.

Ж.Бугубаева - «Информатика жана эсептөөчү техника» кафедрасынын башчысы