2022-жылдын 31-майында КУУнун жамааты салтка айланып калган "Улуттук университеттин күнүн" белгиледи. Майрамдык салтанат башкы имараттагы чоң жыйындар залында өттү. Иш чаранын алдында ректор Канат Садыков жыйынга конок катары келген Кореянын Кемён университетинин президенти Шин Ильхи мырза баштаган делегация мүчөлөрүн жана Мамлекеттик тил боюнча улуттук  комиссиянын төрагасы Каныбек Осмоналиевди 2-кабаттын фойесиндеги "Кыргыз мамлекеттик университетин ачуу тууралуу" И.Сталин кол койгон СССР Министрлер Советинин токтому жана "Кыргыз мамлекеттик улуттук университетин" "Кыргыз улуттук университети" деп кайра атоо жөнүндө президент А.Акаев кол койгон жарлыктар жазылган жаңы маалымат тактайлары менен тааныштырды. 

Салтанаттуу жыйындын башында Канат Садыков Кореянын Кемён университетинин президенти Шин Ильхи мырзага "КУУнун ардактуу доктору" наамын ыйгаруу жөнүндө буйрукту окуп, сыйлык ээсине "Ардактуу  доктордун" дипломун тапшырды жана мантиясын кийгизди. Жаңыдан гана КУУнун ардактуу доктору болгон Шин Ильхи мырза адамзаттын жаңы маданий тарыхы тууралуу лекция өтүп, Омар Хайямдын рубаилеринен окуп берди.

Жыйындын андан аркы бөлүгүндө ректор окуу жайдын жамаатын Улуттук университеттин 90 жылдык мааракеси менен куттуктап, КУУда көп жылдан бери үзүрлүү эмгектенип, жаш муундарды окутуп, тарбиялоодо зор ийгиликтерге жетишкен кызматкерлерге Билим берүү жана илим министрлиги (сыйлангандардын тизмеси) менен КУУнун сыйлыктарын тапшырды.

Сыйлыктар о.э. Кыргыз Республикасынын Президентине караштуу Мамлекеттик тил боюнча улуттук комиссиянын төрагасы Каныбек Осмоналиев (сыйлангандардын тизмеси), Бишкек шаарынын мэриясынын (сыйлангандардын тизмеси), Биринчи май администрациялык району боюнча Бишкек шаарынын мэриясынын муниципалдык администрациясынын башчысы Максат Сазыкулов, Ленин администрациялык району боюнча Бишкек шаарынын мэриясынын муниципалдык администрациясынын өкүлү, окуу жайдын профсоюз комитетинин төрагасы Кубанычбек Жумабеков тарабынан тапшырылды. Ал эми мамлекеттик тил жана тарбия иштери боюнча проректор Садык Алахан КУУнун окутуучу-профессорлорунун арасында өткөрүлгөн мамлекеттик тилде окулган “Мыкты лекция”, “Мыкты практикалык сабак” сынагынын жеңүүчүлөрүн сыйлады.

Иш чарага Кемён университетинен келген делегация мүчөлөрү да катышты. Алар: эл аралык бөлүмдүн деканы Ким Сонджунг айым, орус тили жана адабияты мугалими Пак Сунжин айым, эл аралык бөлүмдүн координатору Чой Хенвук мырза жана Кыргызстандагы корейлердин коомдук бирикмесинин президенти Вячеслав Хан.

Салтанаттуу жыйын аяктаган соң, Шин Ильхи баштаган Кемён университетинин делегациясы техникалык каражаттары менен жабдыктары өзү жетектеген окуу жайдын каражатына алынган журналистика факультетинин "Баласагын ТВ" студиясы жана маалыматтык жана инновациялык технологиядар факультетинин компьютердик классы менен таанышып, Кемён университетинин стипендиясына ээ болгон студенттер менен баарлашты.