2022-жылдын 30-майында башкы имараттагы чоң жыйындар залында Улуттук университеттин 90-жылдыгына карата чыгарылган “Тарых жана чөлкөм таануу факультетинин тарыхы” китебинин бет ачар аземи болуп өттү. Аталган эмгекте факультеттин 1932-жылдан баштап 1991-жылга чейинки калыптануу жана өнүгүү мезгилдери чагылдырылган. Иш чараны кириш сөз менен КУУнун ректору Канат Садыков ачып, университеттин 90 жылдыгына карата иш чаралар апрелдин ортосунан баштап эле өткөрүлүп жатканын, бүгүнкү иш чара да ошолордун бири экенин белгилеп, бет ачары болуп жаткан китеп КУУнун ички илимий грантынын эсебинен даярдалып, басмадан чыгарылгандыгын билдирди.

Ректор о.э. жогорку билим берүү системасында күтүлүп жаткан өзгөрүүлөр, университеттин катышуусу менен ишке ашырыла турган проекттер жөнүндө кыскача баяндама жасап, алардын кээ бирлерине тарых жана чөлкөм таануу факультетинин профессордук-окутуучулар жамааты да тартылаарын айтып берди. 

Китептин рецензенти, УИАнын Б.Жамгырчинов атындагы тарых, археология жана этнология институтунун директору Аблабек Асанканов Улуттук университет - Кыргызстандагы эң алгачкы, эң "аксакал" жогорку окуу жайы экенин белгилеп, жамаатты 90 жылдык маареке менен куттуктады. Академиктин оюнча, "КНУ - больше чем университет. Он не только социальный, но и политический центр". - Тарых факультетинин миссиясы - тарыхый эс-тутумду тарбиялоо жана бул багытта "биринчи скрипканы" ойноо. Манкурт болбойлу десек, тарыхыбызды билишибиз керек. Этникалык иденттүүлүктү сактоодо тарых факультетинин эмгеги эбегейсиз зор, - деп сөзүн жыйынтыктады Аблабек Асанканов. 

Китептин бет ачары менен жыйындын катышуучуларын о.э. эки жолу билим берүү жана илим министри болгон Ишенгүл Болжурова, Кыргыз Республикасынын Президентинин кеӊешчиси Бекболсун Бөрүбашев, коомдук ишмер Мира Жангарачева, КР аялдар конгрессинин президенти Замира Акбагышева, олимпиада чемпиону Каныбек Осмоналиев, КУУнун профессорлору Тынчтыкбек  Чоротегин, Жыргал Момбекова куттукташты. 

Китептин мазмуну, жазылуу тарыхы жана тарыхый булактар менен иштөө жөнүндө Кыргызстан тарыхы кафедрасынын башчысы Темиркул Асанов жана факультет деканы Туратбек Сырдыбаев айтып беришти.