2021-жылдын 21-январь күнү Кыргыз Республикасынын айыл чарба, тамак-аш өнөр жайы жана мелиорация министрлигинин жыйындар залында аталган министрлик менен Жусуп Баласагын атындагы Кыргыз улуттук университетинин жана Айыл чарбасы боюнча Кореянын эл аралык программасынын Кыргызстандагы борборунун (KOPIA) ортосундагы кызматташтык тууралуу Меморандумга кол коюу аземи болуп өттү.

Кыргыз Республикасынын айыл чарба, тамак-аш өнөр жайы жана мелиорация министри Тилек Токтогазиев айыл чарбасын өнүктүрүү боюнча Кыргызстанда аткарылып жаткан иштер боюнча кириш сөз сүйлөп, бул багытта Кореянын тажрыйбалары менен технологияларын колдонуу максатка ылайыктуу экендигин баса белгиледи.

Корея Республикасынын Кыргызстандагы Атайын жана Ыйгарым укукттуу Элчиси Ха Тэ Ёк мырза кыргыздар менен корейлердин өнү-түсү, сырткы келбети окшош, бирок эки өлкөдөгү айыл чарбасынын өнүгүү деңгээли андай эместигин белгилеп, соңку мезгилдерде бул багытта Кыргызстан менен Кореянын ортосундагы иш аракеттер өркүндөп жатканын билдирди. Мисалы, Айыл чарбасы боюнча Кореянын эл аралык программасынын Кыргызстандагы борбору (KOPIA) түзүлүп, аталган борбор Кыргызстандын айыл чарбасына инвестицияларды тартууда.

КУУнун окуу иштери боюнча проректор Бекжан Темиров Улуттук университеттин ботаникалык багы окуу жайдын биология жана география багытында окуп жаткан студенттери үчүн окуу, илимий жана тажрыйба базасы катары колдонулуп келе жаткандыгын белгилеп, KOPIA менен кызматташуу бул багытта көптөгөн ийгиликтерди алып келээрине ишенээрин билдирди.

KOPIAнын директору Ли Санг Дук мырза аталган борбордун ишмердүүлүгү боюнча кыскача маалымат берген соң, Кыргыз Республикасынын айыл чарба, тамак-аш өнөр жайы жана мелиорация министри Тилек Токтогазиев, КУУнун окуу иштери боюнча проректору Бекжан Темиров жана KOPIAнын директору Ли Санг Дук мырза аталган мекемелердин ортосундагы кызматташуу  боюнча Меморандумга кол коюшту.

Аземге о.э. КУУнун административдик-чарба иштери боюнча проректор Туратбек Суранаев, ботаникалык багынын башчысы Улукбек Невераев жана “Тянь-Шандын уруктары” айыл чарба кооперативинин директору Аркадий Кан катышты.