2021-жылдын 14-январь күнү 6-окуу имаратында Факультеттер аралык компьютердик борбор ачылды. Аталган окуяга байланышкан иш чарага КУУнун ректору Канат Садыков, окуу иштери боюнча проректор Бекжан Темиров, академиялык саясат башкармалыгынын окуу процессин координациялоо бөлүмүнүн башчысы Лариса Курманалиева, факультет декандары жана түзүм жетекчилери катышты. Борбордун кире беришине тартылган кызыл лентаны ректор кескенден кийин, иш чаранын катышуучулары жаңыдан ачылган Борборго орнотулган компьютерлер менен таанышып чыгышты.

Канат Садыков жыйындын катышуучуларын аталган Борбордун ачылышы менен куттуктап, аны түзүүнүн себептерине токтолду. Ректордун айтымында, мурда 6-окуу имаратындагы компьютердик класстар бирден-экиден болуп, ар кайсы кабатта чачыранды жайгашкан болсо, эми алар бир жерге чогултулуп, студенттер менен окутуучулар үчүн ыңгайлуу шарттар  түзүлдү. Мындан сырткары, Компьютердик борборду түзүү инженердик кадрлардын штатын оптимизациялоого да мүмкүнчүлүк берет. Мисалы, 4 компьютердик классты мурда 8 инженер тейлесе, эми 2 эле инженер жетиштүү болот.

Ачылып жаткан Борбордо жалпысынан 5 компьютердик класс бар. Алардын экөөндө 20дан, дагы экөөндө 15тен компьютер орнотулуп, физика жана электроника; химия жана химиялык технология; биология; география, экология жана туризм факультеттеринин студенттери тейленет. Ал эми бешинчи класс – окутуучулар үчүн. Ал жерге кадимки компьютерлер, ноутбуктар жана үч функцияны аткарган принтер орнотулуп, окутуучулар үчүн бардык шарттар түзүлгөн. Алар эми аталган класска келип, онлайн-сабак өтүшсө болот.

Математика жана информатика факультети компьютерге байланышкан адистерди даярдагандыктан, алардын компьютердик классы өзүнчө болот. 

Ректор ушундай эле Компьютердик борборлор 1, 5, 6А жана 8-окуу имараттарында да ачылаарын билдирип, бул иш-аракеттер өлкөбүздөгү санариптештирүү саясатынын талаптарына да ылайык келээрин белгиледи.