Педагогика факультетинде 7-декабрдан 12-декабрга чейин А.Осмонов менен Ч.Айтматовдун өмүрү, чыгармачылыгына арналган «Адабият - жан азыгы» аттуу жумалык болуп өттү. Филологиялык жана социалдык–экономикалык билим берүү кафедрасынын тилчи, адабиятчы окутуучулары тарабынан уюштурулган иш чаранын алкагында түрдүү номинациядагы конкурстар болуп, студенттер улуу эки залкарга арналган видео-слайддарды көрсөтүп, көркөм окууларды, поэзия кечелерин, ачык сабактарды өткөрүштү.

Ар бир номинация боюнча студенттердин ишин баалоодо п.и.к., доцент Каным Сураналиева, ф.и.к. Бермет Сыдыкбаева, ф.и.к.,доцент Гүлбарчын Исмаилова, ф.и.к,, доцент Зейнеп Кудайбергеновалар жоопкерчилик менен мамиле кылышты.

Жумалыктын жыйынтыгы 11-декабрда чыгарылды. «Үйрөнүп жаткан тилдин методикасы» дисциплинасы боюнча 3-курс студенти Күрүчбек кызы Мээрим «Ч.Айтматовдун чыгармачылыгы киноискустводо» деген темада дасыккан окутуучулардан кем калышпаган ачык сабак өтсө, ФОК-18 группасынын студенти Туратбек кызы Алина «Алыкул Осмонов  жана музыка» аттуу тарбиялык саатты мыкты деңгээлде өттү.

Андан кийин, «Көчмөндөр цивилизациясы - чыгармачылыктын негизи» аттуу акыл-таймаш оюну өткөрүлүп, катышуучулар көчмөн элибиз колдонгон буюмдар,  улуттук тамак-аштар, каада-салттар, элдик оозеки чыгармалар боюнча ат салышты. Таймаш ФОК-1-20 жана ФОК-1-18 тайпаларынын ортосунда болду. Конкурсанттар салт көрсөтүүдө,  салттуу ырларды жандуу аткарууда жогорку чеберчиликке жетишти.

Мелдеш педагогика илимдеринин доктору Айгүл Мукамбетованын демилгеси жана жетекчилиги менен уюштурулуп, эң жогорку деңгээлде өттү.

Акыл таймашта ФОК-1-18 тайпасы 32 упай менен алдынкы орунга чыкты, ал эми ФОК-1-20 тайпасы 31 упайга ээ болду.

Факультет деканы Рахат Сулайманова жеңүүчүлөрдү жана иш-чараны уюштурган мугалимдерди жетишкен ийгиликтери менен куттуктап, өзүнүн каалоо-тилектерин айтты.

Кабылова Света - педагогика факультетини ага окутуучусу