Урматтуу Кыргыз улуттук университетинин кызматкерлери! Бириккен профсоюз комитети КУУда болуп жаткан акыркы окуяларды жана көрүнүштөрдү кооптонуу, тынчсыздануу жана кабатыр болуу менен кабыл алат. Мында айрым кызыктар адамдар учурдагы, мыйзамдуу шайланган ректор Садыков Канат Жалиловичти ээлеген кызматынан мөөнөтүнөн мурда кетирүүгө аракет кылып жатышат.  Бул биздин окуу жайдагы моралдык-психологиялык кырдаалды туруксуздаштырууга алып келип жатат.

Бириккен  профсоюз  комитети Кыргыз Республикасынын эмгек мыйзамдарынын ченемдерин негизге алып, кызматкерди, уюмдун же мекеменин жетекчисин ээлеген кызматынан мөөнөтүнөн мурда бошотуу кандайдыр бир объективдүү себептер же жүйөөлөр болгондо гана мүмкүн экендигин белгилейт. Мыйзамдын талаптарынын чегинде, тиешелүү ыйгарым укуктуу органдын мындай чечими эч кандай негизсиз чыгарылса, анда мыйзамсыз деп табылат.Профсоюз - мыйзам боюнча, мыйзам чегинде, мыйзам алкагында ар дайым иш алып барып келет жана иш алып барат! Профсоюздун эң башкы талабында университеттин ар бир кызматкерин мыйзам чегинде, жамааттык келишимде көрсөтүлгөн пункттарга ылайык, мыйзамдуу түрдө укугун коргоо турат. Профсоюз баардык кызматкерлерди, аткаруучу, жетектөөчү болобу КРнын мыйзамына жараша, эмгек кодексиндеги белги, көрсөтмөлөрүнө таянып жыйынтык чыгарат.

Садыков Канат Жалилович ректорлукка шайлангандан бери  жумуш берүүчү тарабынан биздин социалдык өнөктөш катары, КУУнун Профсоюз комитети менен социалдык өнөктөштүктүн жана ишкердик кызматташуунун негизги принциптерин жана формаларын өз деңгээлинде  өнүктүрүп, иштеп чыкты.  КУУнун ректору менен Профсоюз комитетинин ортосунда 2017 - 2020 жана 2020 - 2023 - жылдарга ылайык түзүлгөн КУУнун жамааттык келишимдери КУУнун кызматкерлеринин социалдык кызыкчылыгына багытталган.  Түздөн-түз ректор Садыков Канат Жалиловичтин колдоосу менен “Университет” пансионатына кызматкерлер үчүн жеңилдетилген талондордун баасы (КУУнун жана КУУнун Профсоюз комитетинин бюджеттеринин катышуусу менен)50% га чейин  төмөндөтүлдү;  2020-жылы КУУнун тарыхында биринчи жолу алардын үй-бүлө мүчөлөрү пансионатка жеңилдетилген жолдомолорду ала алышты.  2017, 2018, 2019, 2020-жылдар аралыгында карылар жана Улуу Ата Мекендик согуштун ардагерлери, күндүн каармандары, окутуучулар жамааты жана башка кызматкерлер, кандидаттык жана докторлук диссертацияларын ийгиликтүү коргогон кызматкерлердин ар кандай категориялары материалдык жана акчалай колдоонун жана стимулдаштыруунун түрлөрү менен камсыздалды. Көптөгөн университеттерден айырмаланып, өз ишмердүүлүгүн зыяндуу шарттарда жүргүзгөн КУУнун бардык кызматкерлери 15% жана 25% эмгек акыга кошумча акы алышат.  Жай мезгилинде COVID-19 пандемиясынын жайылышынын абдан оор мезгилинде, ошондой эле калкты медициналык тейлөөдө пайда болгон көйгөйлөрдүн мезгилинде бюджеттин эсебинен ректор Садыков К.Ж жана Профсоюз комитетинин демилгеси менен июль айында убактылуу “Жамааттык борбор” түзүлдү.   Бул борбор коронардык инфекцияны жуктуруп алган бардык кызматкерлерге жана алардын үй-бүлө мүчөлөрүнө жашаган жерине барып, акысыз медициналык  жардам (ийне жана тамчылатма ийне ) көрсөттү. Бул аталган борбордо медайым эртеден кечке иш алып барып,  кызматкерлерге ыкчам кызмат көрсөтүлүп жатты.

Университеттин белгиленген келишиминин негизинде Канат Жалилович администрация менен биргеликте жетиштүү деңгээлде  иш алып бара алды. Мөөнөтүнөн мурда ээлеген кызматынан  бошотуу эч кандай обьективдүү принциптерди, жүйөөлүү себептерди камтыбайт.

КУУнун ,ириккен профсоюз комитети өз тарабынан университеттин кызматкерлеринин премьер-министрге, Кыргыз Республикасынын президентинин милдетин аткаруучу Жапаров Садыр  Нургожоевичке университеттин жетекчилигинде мыйзамсыз кадрдык өзгөрүүлөрдү жүргүзүү боюнча иштерди токтотуп туруу боюнча кайрылууларын толугу менен колдойт.

КУУнун профсоюз комитети азыркы учур Кыргызстан жана университет үчүн оңой жыйынтык чыгара турган жөн салды маселеде турбаганын белгилейт. Миңдеген кызматкерлер иштеген, миңдеген келечек кесип ээлери студенттер билим ала турган куттуу жер тебелендиде же кандайдыр бир саясий күчтүн курмандыгы болуп калбашын белгилейт. Алдыдыгы университтин чоң масштабдагы ири долбоорлору, илимий иштери, окуу кыймылы өз нугунан токтобой улантылышы керек. Мамлекет жана билимдин казынасы болгон  университет үчүн оор жана тагдыр чечүүчү мезгилде чогулуп, чоң масштабдагы милдеттердин, пландардын жана долбоорлордун чечилишин, аткарылышын биздин университет, мамлекет жана анын жарандык коому тарабынан камсыз кылууга чакырат.

Биздин күчүбүз – бул биздин биримдигибиз!

КУУнун профсоюз комитетинин төрагасы Жумабеков К. С.