Дүйнөдөгү эң күчтүү мээрим - бул балага болгон мээрим, сүйүү болсо керек. Ата-эне үчүн баланын бакытынан бөлөк бакыт жок. Профсоюз комитети ар бириңиздердин балдарыңызды бүгүнкү Балдарды коргоонун эл аралык күнү менен куттуктайт! Урматтуу кесиптештер, баарыбызга маалым болгондой, сиздер ата-энелик мээрим, камкордук менен айкалышкан билимди келечек муунга берип жатасыздар. Жумушуна берилип, өз балдарынан дагы окуткан студенттерин артык көрүп, алардын билим алышына жан үрөп, көп убакыт, саатыңыздарды адистикке тарбиялоого арнап жатасыздар.

Жусуп Баласагын атындагы Кыргыз улуттук университетинде эмгектенген кесиптештердин балдарын, кичинекей бөбөктөрүн майрам менен чын жүрөктөн куттуктайм! Ар бир балага бактылуу балалык, баа жеткис, эң таттуу күндөрдү, мүнөттөрдү каалайм! Балдарыбыздын жылмайганы ааламды нурга бөлөй берсин. Баардык үйдө бөбөк күлкүсү жанырсын. Ойносо оюнга, күлсө күлкүгө эч тойбогон балалыктын баасы кемибесин.

Кыргызстандын эртеңки келечеги биз жетелеп турган балдарыбызда. Демек, жакшы тарбия менен тарбиялоо, жакшы багыт берүү биздин, сиздин эң ыйык вазыйпабыз. Балдарды коргоонун эл аралык күнү менен дагы бир жолу чың дилден куттуктайм. Биз издеген аруулуктун символу – силерсиңер бөбөктөр!

Эльнура Шакирова – профкомдун референти