Урматтуу кесиптештер, кымбаттуу студенттер! Республикабыздагы эң мыкты, тамыры түптүү, кулачы бийик, не бир залкарларды, улуу окумуштууларды, эли-жерибиризге аттын кашкасындай таанымал болгон адамдарды тарбиялап, билим берген Жусуп Баласагын атындагы Кыргыз улуттук университети баарыбыз үчүн куттуу, ыйык билим уя экени талашсыз. Сиздерди «Кыргыз улуттук университетинин» күнү менен чын жүрөктөн куттуктайм.

Университетибиздин арышы улам сайын кеңейип, ишмердүүлүгү артып, өлкөгө керектүү, билимдүү, кесипкөй адистерди даярдоодо жана тарбиялоодо ар дайым алдынкы орунда болушун каалайм.

Өлкөнүн гүлдөп-өнүгүшү анын илим-билиминде экени анык. Барыбызга белгилүү болгондой биздин Кыргыз улуттук университетинин билиминин пайдубалы түптүү жана күчтүү. Биз сыймыктанган бир катар окутуучу-профессорлор өз билимдерин, тажрыйбаларын татыктуу түрдө жаштарга берип жатышат.

Университет күнү менен баарыңыздарды куттуктайм! Университетте эмгектенген, билим алган бардык замандаштарга ийгилик, бакубатчылык, чоң жетишкендиктери каалайм. Ийин тирешкен ынтымак менен ар бирибиз университет үчүн кызмат кыла берели. Заманбап илим- билим менен айкалышкан, билим, спорт, маданият баардык жактан эң алдыңкы окуу жайлардын сап башында Кыргыз улуттук университетинин желеги желбиресин!

Майрамыңыздар менен!