2020-жылдын 21-февралында башкы имараттагы чоң жыйындар залында 23-февраль Ата Мекенди коргоочулар күнүнө карата коомчулук менен байланышуу жана жаштар иштери боюнча департамент тарабынан уюштурулган “Жоокер ыры” сынагынын финалдык туру болуп өттү. Иш-чараны окуу иштери боюнча проректор Бекжан Темиров ачып, жалпы жамаатты Ата Мекенди коргоочулар күнү менен куттуктап, бекем ден соолук, күч-кубат, ынтымак каалап, патриоттуулукка чакырды жана тынчтык үчүн курман болгон бабаларыбыздын эмгеги эч качан унутулбасын баса белгилеп, конкурсанттарга ийгилик каалады.

Куралдуу күчтөрдүн башкы штабынан келген полковник Ашымжан Эсенкулов эр-азаматтарды патриоттулукка, ыймандуу жана жоопкерчиликтүү болууга үндөп, майрам менен куттуктады.

Уюштуруучулар тарабынан даярдалган Ата-Мекендик согуштан берки доорду баяндаган видео-материал тартууланган соң, жүрөк толкуткан конкурс башталып, студенттердин обондуу ырлар, монолог жана көркөм окуу боюнча көрсөткөн өнөрлөрүн калыстар тобу байкап отурушту.

Кол чабуулар менен коштолгон конкурс соңуна чыгып, калыстар тобу өз бааларын берип, орундарды ыйгарышты:

Обондуу ырлар боюнча:

• 1-орун: Айбек уулу Адилет (кесиптик колледж) - “Офицерлер”
• 2-орун: Акимбаева Мээрим (кыргыз-кытай факультети) - “Журавли”
• 3-орун: Токтоналиев Тилек (журналистика факультети) - “Чек ара”.

Монолог боюнча:

• 1-орун: Аскарова Нурзат (кыргыз филологиясы факультети) - “Майсалбектин каты”
• 2-орун: Айтбаева Аидана (мамлекеттик жана муниципалдык башкаруу факультети) - “1941-жыл”
• 3-орун: Кислицына Олеся (социалдык-гуманитардык илимдер факультети) - “Баллада о матери”.

Көркөм окуу боюнча:

• 1-орун: Эсенгелди уулу Бексултан (тарых жана чөлкөм таануу факультети)
• 2-орун: Акималы уулу Бийжигит (кесиптик колледж)

Байгелүү орун алган катышуучуларга грамоталар менен кошо төмөндөгү сыйлыктар тапшырылды:

• 1-орун: Ч.Айтматовдун 10 томдугу
• 2-орун: К.Жантөшевдин “Каныбек” романы (1, 2 - том)
• 3-орун: К.Сактановдун “Маркумдар үнү” китеби..

Калган бардык катышуучулар “Ыраазычылык каттар” менен сыйланышты.

Сыйлык алгандарды калыстар тобунун мүчөлөрү, куралдуу күчтөрдүн ардагери, запастагы полковник Болот Келгенбаев жана коомчулук менен байланышуу жана жаштар иштери боюнча департаменттин директору Каныбек уулу Ардакбек кызуу куттукташты.

КУУнун коомчулук менен байланышуу жана жаштар иштери боюнча департаменти Улуттук университеттин жалпы окутуучу-профессорлору менен студенттерин Ата-Мекенди коргоочулар күнү менен куттуктап, иштерине, окууларына ийгилик каалайт!