2019-жылдын 29-ноябрында башкы имараттагы чоң жыйындар залында таанымал илимпоз жана педагог, т.и.к., доцент Таавалды Мурзабековдун 70 жылдык мааракесине жана ал тууралуу жаңы китептин бет ачарына арналган илимий жыйын болуп өттү. Тарыхчы-окумуштуулар, студенттер, ЖМК өкүлдөрү, маркумдун жакындары жана жердештери катышкан иш чараны мамлекеттик тил жана тарбия иштери боюнча проректор Садык Алахан (Тиллебаев) ачып, кириш сөз айтты.

Таанымал илимпоз жана педагог Таавалды Мурзабековго арналган даректүү сүрөт баян көрсөтүлөн соң, совет доорунда Кыргызстандын дипломатиясынын тарыхый өңүттөрүн изилдеген, өз учурунда саясий жалаа менен кодулоого дуушарланган таанымал илимпоз жана педагог тууралуу эскерүүлөрү менен КР Президентинин Аппаратына караштуу “Мурас” фондунун жетекчиси Кыяс Молдокасымов, И.Арабаев атындагы КМУнун ректору Төлөбек Абдырахманов, Эл аралык Кыргыз-Түрк Манас университетинин проректору Анварбек Мокеев, КУУнун профессору Жаныбек Жакыпбеков, профессор Искендер Исамидинов ж.б. бөлүштү. 

Иш чаранын экинчи бөлүгүндө таанымал илимпоз жана педагог Таавалды Мурзабеков тууралуу жаңы китептин бет ачары болду.

Кыскача маалымат 

Таавалды Мукайыл уулу Мурзабеков (замандаштары “Табылды”, “Таабалды”, “Табыке” деп да кайрылышчу; 1948—1991) — кыргыздын белгилүү тарыхчысы, педагогу, тарых илимдеринин кандидаты, КУУнун доценти.

Ал 1948-жылы 4-июнда азыркы Ысык-Көл облусуна караштуу Жети-Өгүз районунун Кичи-Жаргылчак кыштагында туулган. 1969-жылы Кыргыз мамлекеттик университетинин (азыркы Жусуп Баласагын атындагы КУУнун) тарых факультетин артыкчылык диплому менен бүтүргөн. Дипломдук ишинин жетекчиси – т.и.к. Мидил Жамгырчинов болгон.

Ал 1969–1972-жылдары КМУнун тарых факультетинде күндүзгү аспирантурада таалим алган. 1980-жылы ал Кыргызстандын тарых илими үчүн жаңы багытта тарых илимдери боюнча кандидаттык диссертациясын жактады. Анын темасы «Кыргыз ССРинин Европанын социалисттик өлкөлөрү менен экономикалык, илимий жана маданий жактан кызматташтыгы (1950-жж. экинчи жарымы - 1970-жж.)» деп аталган. Жетекчиси – т.и.д., профессор Анварбек Хасанов болгон.

Т.М.Мурзабеков 1972-жылдан өмүрүнүн соңуна чейин КМУнун тарых факультетинде окутуучу, ага окутуучу, доцент, декандын жардамчысы, декан болуп иштеген. Жалган саясий жалаанын айынан 1987-жылы 25-январда декан кызматынан кетүүгө аргасыз болгон. “Кайра куруулар” доорунун соңунда, 1991-жылы – КМУнун проректорунун милдетин аткаруучу сыяктуу кызматтарды аркалаган. Демек, анын адистик өмүрү толугу менен Кыргыз улуттук университетине (мурдагы КМУга) арналды.

1991-жылы 9-октябрда Таавалды Мукайыл уулу Мурзабеков педагог-окумуштуу жана уюштуруучу катары толукшуп турган кезинде, болгону 43 жашында жүрөгүнөн кармап дүйнөдөн кайткан.

1992-жылы Т.М.Мурзабековдун айылдаштары Кичи-Жаргылчак кыштагындагы орто мектепке анын ысымын ыйгарышты.

Шилтемелер:

URL: http://ky.wikipedia.org/wiki/Мурзабеков,_Таавалды_Мукайыл_уулу 

https://www.azattyk.org/a/kyrgyz_ussr_history_education_taabaldy_murzabekov_blog_tch_ky/29808414.html

Жаркын элеси өчпөйт: Тарыхчы жана педагог Таабалды Мурзабековдун (1948––1991) 70 жылдыгына: (Макалалар топтому) / Жооптуу редактор Т.К.Чоротегин. –– Бишкек: “Турар” басмасы, 2019. –– 300+xvi  б., сүрөт.  ––  “Мурас” фонду.  –– “Кыргыз Тарых Коому” ЭКБсы. –– Жусуп Баласагын атындагы КУУ. –– И.Арабаев атындагы КМУ. –– КР УИАсынын ТАЭИ. – “Тарых жана мурас” түрмөгү. –– ISBN  978-9967-15-959-4.

Уюштуруу тобу.

Байланыш дареги: 0557 153 103; 707 184 979; Иш телефону:  (0312) 66 04 05

Э-дарек: kaganat2012@gmail.com