2023-жылдын 17-мартында башкы имараттагы жыйындар залында КУУнун ректору Төлөбек Абдырахманов юридикалык институттун жамааты менен жолугушуу өткөрдү. Жыйындын башында ал 28-февралда чыккан буйруктун негизинде Улуттук университеттин ректораты менен курамдык бөлүктөрүндө чоң өзгөрүүлөр болуп, 11 институт, 13 факультет, бир нече колледж түзүлгөнүн, ошол документ боюнча КУУнун курамында юридикалык институт пайда болгонун кабарлап, эки чоң курамды - мурдагы юридикалык факультет менен Кыргыз мамлекеттик юридикалык академиясын - бириктириш абдан чоң маселе экендигин билдирди жана буга байланышкан бардык суроолорду окуу жылынын аягына чейин "кайра кайрылбагыдай" кылып чечип, 1-сентябрда жаңы окуу жылына киришүү зарыл экендигин баса белгиледи. 

Андан соң Төлөбек Абырахманов жыйындын катышуучуларына 2023-жылдын 11-мартынан тартып юридикалык институттун директорунун милдетин убактылуу аткаруу кызматы жүктөлгөн илимий иштер боюнча проректор, педагогика илимдеринин доктору, профессор Назаркул Ишекеевди жана директордун орун басарлары болуп дайындалган мамлекеттик башкаруу илимдеринин доктору, доцент Досалы Иманбердиевди (окуу иштери боюнча), Нуржана Бардыбаеваны (тарбия иштери боюнча), юридика факультетинин кылмыш процесси жана соттук экспертиза кафедрасынын доценти, юридика илимдеринин кандидаты Байтик Бузурманкуловду (илимий иштер боюнча) тааныштырды.

Жыйындын жүрүшүндө ректор эмне үчүн бул адамдар аталган кызматтарга дайындалганын негиздеп, бириктирүүгө байланышкан суроолорго да жооп берди.

- Тынчсызданып, суроо берип атканыңарды да түшүнөм. Кудай Таала маңдайга ушуну жазыптыр. Мындан ары бири-бирибизге чыдап, бир коллектив болуп, чогуу иштешибиз керек. Суроолор болсо келгиле, кайрылгыла. Нооруз майрамында силерге аманчылык, ден-соолук каалайм. Бөөдө кырсыктан сырткары болгула, жаман көз, жаман сөздөн кудай сактасын. Улуттук университеттин реномесине, авторитетине маани берип, атагын чыгарып, чогуу, ынтымакта болуп, шымаланып иштеп койсок, жүзүбүз жарык болот, - деп сөзүн жыйынтыктады Төлөбек Абдырахманов.