КУУдагы соңку жаңылыктар

2019-жылдын 15-май күнү химия жана химиялык технология факультетинде магистранттардын жана аспиранттардын илимий-практикалык конференциясы болуп өттү. Иш чарада бүгүнкү күндө химия жаатында актуалдуу болуп жаткан темалар көтөрүлүп, конференция кызыктуу талкуулар менен коштолду. Өзгөчө суроолорду жана талкууларды "Темирдин жана неодимдин гидроксиддеринин нанобөлүкчөлөрүн камтыган гумин композиттеринин касиеттерин изилдөө" жана "Кыргызстандын өсүмдүктөр сырьесунан алынган целлюлозанын физикалык-химиялык мүнөздөмөсү" атту темалар жаратты.

2019-жылдын 11-май күнү география, экология жана туризм факультети тарабынан Улуу Жеңиш күнүнө карата өткөрүлгөн кичи футбол боюнча студенттер аралык мелдешке социалдык-гуманитардык илимдер факультетинин студенттеринен түзүлгөн курама команда активдүү катышып, биринчи байгени багындырды жана чемпион аталды, ал эми аталган факультеттин философия багытында окуган 4-курс студенти Акматов Даниел «Мыкты оюнчу» наамына татыктуу болду.

2019-жылдын 11-майында Чолпон-Ата шаарында Кыргызстандын Шанхай кызматташтык уюмундагы төрагалыгына арналган 8–Эл  аралык «Run the Silk road» Ысык-Көл марафону жыйынтыкталды. Мелдешке биология факультетинин биотехнология адистигинин 1-курс студенти Ишеналиева Назима катышып, аялдар арасындагы абсолюттук категорияда 10 км аралыкка чуркоодо байгелүү 3-орунду багындырды.

2019 жылдын 8-май күнү №7-жатаканада жашаган математик студенттер менен тыгыз байланышта болуу, аларга ар тараптан туура кеңеш берип, бир күн болсо да көңүлдөрүн көтөрүү максатында математика жана информатика факультетинин дифференциалдык теңдемелер кафедрасынын күнү өткөрүлдү. Иш-чаранын биринчи бөлүгүндө декандын м.а., аталган кафедранын башчысы, профессор Изат Усенов түзүмдүн тарыхы, окутуучулар курамы менен тааныштырса, экинчи бөлүгүндө окутуучулар менен студенттер "Региондорду өнүктүрүү жана санариптештирүү жылы" жөнүндө маек курушту.

2019-жылдын 7-майында Улуттук университетте Улуу Ата Мекендик согуштагы жеңиштин 74-жылдыгына арналган иш чаралар болуп өттү. Адегенде мамлекеттик тил жана тарбия иштери боюнча проректор Садык Алахан (Тиллебаев) менен бириккен профсоюз комитетинин төрагасы Кубанычбек Жумабеков баштаган активист студенттер Жеңиш аянтына барып, Түбөлүк оттун жанына Улуттук университеттин жамаатынын атынан гүлчамбар коюшту. 

2019-жылдын 7-майында КУУнун ректору Канат Садыков баштаган делегация Ош мамлекеттик университетине кызматтык сапар менен барып, ОшМУнун ректору Каныбек Исаков менен жолугушту. Жолугушуунун жүрүшүндө өнөктөштүк алакалар, келечек пландар талкууланып, эки тараптуу кызматташуу боюнча келишимге кол коюлду. Иш сапардын алкагында КУУнун өкүлдөрү о.э. ОшМУнун факультеттеринде, окуу лабораторияларында, клиникаларында болуп, студенттер үчүн түзүлгөн шарттар, электрондук башкаруу системасы жана инновациялык иш аракеттер менен таанышып чыгышты.

2019-жылдын 6-май күнү КУУнун ректору Канат Садыков Казакстандын Кыргызстандагы Атайын жана Ыйгарым укуктуу Элчиси Карим Кокрекбаев баштаган казак университеттеринин жетекчилерин кабыл алды. Жолугушуунун  жүрүшүндө Улуттук университет менен Казак улуттук педагогикалык университети, Тараз мамлекеттик университети, Тараз мамлекеттик педагогикалык университети, Тараз инновациялык-гуманитардык университети жана Түштүк-Казак мамлекеттик университеттеринин ортосунда окутуучулар менен студенттердин, аспиранттардын жана докторанттардын мобилдүүлүгүн ишке ашыруу багытында кызматташуу  боюнча меморандумдарга кол коюлду. . 

Бул тууралуу Окумуштуулар кеңешинин 2019-жылдын 30-апрель күнү болуп өткөн отурумунда КУУнун ректору Канат Садыков билдирди. Анын айтымында, медициналык кадрларды даярдоодо зор тажрыйбасы бар Индиянын Бхопал шаарындагы медициналык университет болочок "кыргыз-индия медицина факультетинин" негизги өнөктөштөрүнүн бири болмокчу. - 27-апрель күнү биз аталган университеттин башкы колдоочусу, Кыргызстандагы ири инвестициялык проекттердин катышуучусу "LN Group" компаниясынын өкүлдөрү менен бул багытта кызматташуу боюнча меморандумга кол койдук, - деди Канат Садыков.

2019-жылдын 29-апрелинде башкы имараттагы 327-дарсканада тарых жана чөлкөм таануу факультетинин чөлкөм таануу жана кыргыз таануу кафедрасы тарабынан уюштурулган “Шанхай кызматташтык уюму жана чөлкөм таануунун актуалдуу проблемалары» аттуу кезектеги студенттик илимий-практикалык конференция болуп өттү. Иш чараны факультет деканы Аскар Беделбаев ачып, маданияттар аралык байланыштар жана тилдин актуалдуу маселелерине кеңири токтолуп, мындай конференциялар студенттер, мугалимдер жана жаш окумуштуулар үчүн өтө маанилүү жана пайдалуу экендигин белгиледи.

2019-жылдын 29-апрель күнү кыргыз филологиясы факультетинин окутуучулары Суусамыр өрөөнүндөгү Исманжан Бегимкулов атындагы мектепке барып, профориентациялык иштерди жүргүзүп келишти. Иш чаранын жүрүшүндө КУУнун өкүлдөрү кыргыз тили жана адабияты мугалимдери үчүн семинар-тренинг өтүшүп, окуу-методикалык китептерди тапшырышты. 

2019-жылдын 29-апрель күнү №7-жатаканада жашаган болочок математиктер менен тыгыз байланыш түзүү максатында математика жана информатика факультетинин алгебра, геометрия, топология жана жогорку математиканы окутуу кафедрасынын күнү өткөрүлдү. Иш чаранын биринчи бөлүгүндө кафедра башчысы Бекболот Канетов түзүмдүн тарыхы, окутуучулар курамы менен таныштырып, экинчи бөлүгүндө жаштардын Кыргызстандын өнүгүүсүнө кошкон салымы тууралуу маселелер талкууланды.

Маалыматтык жана инновациялык технологиялар факультетинин студенттери Ордо оюну боюнча чоң ийгиликтерге жетишүүдө. Алсак, "Аймактарды өнүктүрүү жана санариптештирүү жылына" карата Ош шаарында өткөрүлгөн жогорку окуу жайлардын Универсиадасында факультет студенти Темирбеков Адилет III орунду ээлеп, медаль жана диплом менен сыйланса, факультеттер аралык ”Ден cоолук” спартакиадасында Ордо боюнча факультеттин командасы II-орунга ээ болду.

2019-жылдын 27-апрелинде КУУнун ректору Канат Садыков LN Group компаниясынын аткаруучу директору Дхармендра Гупта мырза жетектеген индиялык делегацияны кабыл алды. Жолугушууда Улуттук университетте медициналык факультет ачууга байланышкан маселелер талкууланып, аталган багытта КУУ менен LN Group компаниясынын кызматташуусу тууралуу меморандумга кол коюлду. 

Мамлекеттик тил жана тарбия иштери боюнча проректор, филология илимдеринин доктору, профессор Садык Алахан (Тиллебаев) 22-25-апрель күндөрү Казакстанда өткөн түрк тилдүү мамлекеттердин университеттеринин союзунун (Түрк Кеңештин) Генералдык ассамблеясынын IV сессиясына катышып келди. Алгачкы күнү Түрк кеңештин жаш лидерлеринин II форумунун фестивалы жана университеттердин жетекчилери үчүн уюштурулган маданий программа болду.

Журналистика факультетинин студенттери 2019-жылдын 15-20-апрель күндөрү Красноярск шаарындагы академик М.Ф.Решетнев атындагы Сибирь мамлекеттик илим жана технология университетинде (СибГУ) болуп өткөн XVII Бүткүл россиялык жарнама жана коомчулук менен байланыш фестивалынын алкагында болуп өткөн «Енисейдеги жарнама жана коомчулук менен байланыш жумалыгына» («Ярпиар-2019»)  катышып, жакшы ийгиликтер менен кайтышты.

Педагогика багытында билим алып жаткан жогорку окуу жайлардын студенттери, магистранттары жана аспиранттары үчүн социалдык-гуманитардык илимдер факультетинин окумуштууларынын автордук коллективи тарабынан жазылган "Этнопедагогика" деген аталыштагы окуу куралы басмадан чыкты. "Китеп болочок мугалимдердин кесиптик компетенттүулүгүн калыптандырууга жакшы шарт түзөт", - деп айтылат окуу куралынын аннотациясында. 

2019-жылдын 23-апрель күнү Улуттук университеттин жайкы футбол аянтчасында Кайып Оторбаевдин жаркын элесине арналган "Ректордун кубогун" жеңип алуу үчүн факультеттердин кызматкерлеринин арасында кичи футбол боюнча турнир болуп өттү. Таймашка ректораттын, педагогика; география, экология жана туризм; экономика факультеттеринин, юридикалык колледждин  жана физика жана электроника факультети менен математика жана информатика факультетинин курама командалары катышып, мыкты оюн көрсөтүштү.

2019-жылдын 22-апрелинде Улуттук университеттин №7-жатаканасында заманбап ашкана ачылды. Иш чарага КУУнун ректору Канат Садыков, проректорлор жана факультеттердин декандары катышып, ашкананын ички-сырткы жасалгасына, коммуналдык шарттарына жана жасалган тамактардын баасы менен сапатына баа беришти. Ректордун айтымында, 6А-окуу имаратында окуган, №7-жатаканда жашаган студенттерди эске алганда, бул жерде дайыма 1,5-2 миӊдей контингент болот.

2019-жылдын 22-апрель күнү КУУнун ректору Канат Садыков Индиянын Кыргызстандагы Элчилигинин 2-катчысы Ракеш Кумар Верма мырзаны кабыл алды. Жолугушууда Элчилик менен Кыргыз улуттук университетинин ортосунда билим берүү тармагы боюнча кызматташтыкты орнотуу жана андан ары өркүндөтүү маселелери талкууланды. Жолугушууга о.э. эл аралык кызматташтык департаментинин начальниги Бактыбек Келдибеков катышты.

2019-жылдын 20-21-апрель күндөрү математика жана информатика факультетинин 50 активист студенттери тарбия иштери боюнча декандын орун басары Бактияр Рахманкуловдун жетекчилиги астында Алма-Ата шаарына барып, эс алып келишти. Алар шаардын кооздугун, тазалыгын көрүшүп, борборубуз Бишкектин мындан аркы өсүп-өнүгүүсүнө өз салымдарын кошууга дайым даяр экендигин билдиришти.

2019 жылдын 19 апрелинде №5-жатаканада "Жаз-деми-2019" аттуу сынак болуп өттү. Аталган иш чара жыл сайын жаз мезгилинде, социалдык-гуманитардык илимдер факультетинин студент кыздарынын арасында уюштурулуп келет. Беш жободон турган мелдешке факультеттин беш студент кызы катышты. Бул сынактын көркүн ачкан калыстар тобунун төрайымы, Кыргыз Республикасынын Эмгек синирген артисти Таалайкан Абазова болду.

Алгебра, геометрия, топология жана жогорку математиканы окутуу кафедрасынын башчысы Бекболот Канетов 2019-жылдын апрель айында Латвия илимдер академиясынын академиги, профессор А.П.Шостактын 70 жылдык юбилейине арналган Латвия университетиндеги абройлуу «FARMS-2019» эл аралык конференциясына катышып, «About one uniform analogue of paracompact spaces» жана «On compact types of uniform spaces» аталыштагы баяндамаларды жасады.

2019-жылдын 19-апрелинде башкы имараттагы чоң жыйындар залында чет тилдер факультети тарабынан уюштурулган “Маданияттар аралык баарлашуу жана прагмалингвистиканын актуалдуу маселелери” аттуу кезектеги 12-университеттер аралык илимий-практикалык конференция болуп өттү. Иш чараны окуу иштери боюнча проректор Бекжан Темиров ачып, маданияттар аралык байланыштар жана тилдин актуалдуу маселелери туурасында кеңири токтолуп, мындай илимий-практикалык конференциялар илимпоздор жана жаш окумуштуулар үчүн өтө маанилүү жана пайдалуу экендигин белгиледи.

2019-жылдын 19-апрель күнү Улуттук университетте мамлекеттик тил боюнча Бишкек шаарындагы ЖОЖдор аралык студенттик олимпиада болуп өттү. Таймашка 15 окуу жайдын 1-курс студенттери катышып, "Дил баян жазуу менен көркөм окуу" жана  "Долбоор коргоо" боюнча тапшырмаларды аткарышты. Студенттердин аткарган иштерин 7 адамдан турган калыстар тобу баалап, аталган номинациялар боюнча жеңүүчүлөр аныкталды.