КУУдагы соңку жаңылыктар

2022-жылдын 27-январь күнү эрте мененки саат 10до 8-окуу имаратындагы конференц-залда 2020-жылдын 13-ноябрында президенттин м.а. Садыр Жапаровдун №39-жарлыгы менен бекитилген "Кыргыз жараны" концепциясын ишке ашыруу максатында мамлекеттик жана муниципалдык башкаруу факультети тарабынан уюштурулган "Жарандык иденттүүлүктү өнүктүрүү саясаты жана практикасы" аттуу тренинг башталды. Жыйынга Чүй областынын мамлекеттик жана муниципалдык башкаруу органдарында иштеген кызматкерлер катышууда.

2022-жылдын 26-январында башкы имараттагы чоң жыйындар залында Кыргыз улуттук университетинин 90 жылдыгына арналган “Тилдерди кесиптик багытта окутуунун технологиялары” аталышындагы семинар-тренинг башталды. Мамлекеттик тил бөлүмү тарабынан уюштурулган иш чараны мамлекеттик тил жана тарбия иштери боюнча проректор Садык Алахан (Тиллебаев) ачып, окуу иштери боюнча проректор Бекжан Темиров куттуктоо сөзүн айтты.

2022-жылдын 23-январь күнү Каба уулу Кожомкул атындагы спорт ордосунда Кыргыз Республикасынын бокс боюнча жаштар арасындагы чемпионаты аяктады. 20-январда башталган мелдешке республиканын бардык аймактарынан жана Бишкек, Ош шаарларынан 19 салмактык категория боюнча 140 мушкер катышты. Чемпионатка №7-жатаканада жашаган Берди кызы Санирабига  да катышып, 60кг. салмактык категорияда экинчи орунду ээледи.

2022-жылдын 24-январь күнү башкы имараттагы конференц-залда КУУнун көзөмөлчүлүк кеңешинин төрагасы, "М Булак" микрокредиттик холдингинин башкы директору Бабыржан Төлбаев кыргыз-кытай факультетинин активист студенттери менен жолугушуу өткөрдү. Төрага Улуттук университеттин өнүгүүсүнүн айрым багытары жана аларды ишке ашыруунун жолдору тууралуу айтып берди.

2022-жылдын 24-январында кыргыз тилчи Элтузерова Гүлзина кышкы эс алуу учурунда матфактын 1-курсунун айылга барбай, шаарда эс алып жаткан студенттери менен бирге маданий агартуучулук максатында Т.Сатылгановдун музейине барып, Токтогулдун башка замандаш акындардан жана комузчу-төкмөлөрдөн айырмасы - ал универсалдуу, б.а. көп кырдуу таланттын ээси болгонуна күбө болуп келишти.

2022-жылдын 21-январь күнү башкы имараттагы санариптик технологиялар борборунда министрликтин буйругу менен түзүлгөн Улуттук университеттин көзөмөлчүлүк кеңешинин биринчи отуруму болуп өттү. Жыйында уюштуруу маселелери каралып, добуш берүүнүн жыйынтыгында аталган кеңештин төрагасы болуп "М Булак" микрокредиттик холдингинин башкы директору Төлбаев Бабыржан Лотиханович шайланды, ал эми кеңештин катчысы милдетин Эл аралык республикалык институттун Кыргыз Республикасындагы өкулчүлүгүнүн программалык координатору Бактыбек уулу Айдин аткармай болду.

"Кыргыз Республикасынын Билим берүү жана илим министрлигинин 2021-жылдын 8-сентябрындагы №1514/1–буйругу менен бекитилген "Ведомстволук сыйлыктар жөнүндө жобонун" жаңы редакциясынын талаптарына ылайык "Жусуп Баласагын атындагы Кыргыз улуттук университетинин сыйлыктары жөнүндөгү жобого" да айрым өзгөртүүлөрдү киргизүү зарылдыгы пайда болду", - деп айтылат КУУнун кызматкерлерине сыйлык берүү боюнча комиссиянын сунуштамасында.

Факультеттер аралык ”Ден cоолук-2022” спартакиадасында стол тенниси, волейбол, стритбол жана тогуз коргоол боюнча турнир болуп өттү. Математика жана информатика факультетинин аталган спорттун түрлөрү боюнча курама командасы атаандаштарын артта калтырып, теннис, волейбол, стритбол жана тогуз коргоол боюнча Улуттук университеттин чемпиону аталды. Факультет жамааты өз командасын бул ийгилик менен чын жүрөктөн куттуктап, мындан аркы спорттук жеңиштерди каалайт.

2022-жылдын 15-январында 6-окуу имаратындагы спорт залда "Ден соолук" спартакиадасынын ачылышы болуп, окуу иштери боюнча проректор Бекжан Темиров баардык спорт сүйүүчүлөрүн ден соолук майрамы менен куттуктады. Андан кийин футбол боюнча турнир өткөрүлүп, административдик жана чарба иштери боюнча проректор Туратбек Суранаев жеңүүчүлөрдү куттуктап, "Эң мыкты оюнчу" деп табылган кесиптик колледждин  оюнчусу Жандос Айдаралиевге акчалай сыйлык берилээрин билдирди.

2022-жылдын 13-январында Жусуп Баласагын атындагы Кыргыз улуттук университетинин профессордук-окутуучулар курамынын жана кызматкерлеринин арасында өтүп жаткан факультеттер аралык «Ден соолук-2022» спартакиадасынын алкагында волейбол боюнча таймаш болуп, педагогика факультетинин волейбол боюнча кыз-келиндер командасы 2-орунду камсыз кылышты. Ал эми 1-орунду математика жана информатика факультетинин курама командасы ээледи.

2022-жылдын 13-январында тарых илимдеринин кандидаты, профессор Кубат Табалдиев Кыргыз-Түрк «Манас» университетинде археологиялык изилдөөлөрдүн жүрүшү» аттуу темада окуу-усулдук семинар өттү. Тарых жана чөлкөм таануу факультети уюштурган иш чарага И.Арабаев атындагы КМУнун, Кыргыз-Түрк «Манас» университетинин , ОшМУнун, БатМУнун, ТалМУнун, С. Нааматов атындагы НМУнун, К.Тыныстанов атындагы ЫМУнун,  Борбор Азиядагы Америка университетинин ж.б. жогорку окуу жайлардын окумуштуулары, магистранттары жана студенттери, о.э. Улуттук тарых музейи баш болгон региондордогу баардык музейлердин кызматкерлери да катышты.

2022-жылдын 10-январь күнү М.В.Ломоносов атындагы Москва мамлекеттик университетинде «Монгольская империя: ее роль в истории и судьба наследия и наследников» аттуу илимий-методикалык онлайн-семинар болуп өттү. МУУнун Азия жана Африка өлкөлөрү институту тарабынан уюштурулган иш чарага КУУнун профессорлору Памира Кадырбекова, Нурлана Ахметова жана кыргыз филологиясы факультетинин магистранттары А.Жекшеналиева, А.Алтынбекова, Н.Боркошев, Рахман кызы Эркайым, М.Калыбекова, А.Кыдыңова Г.Надырбекова жана Ж.Шаршенбаевалар катышты.

2022-жылдын 11-январында №7-жатаканада Жогорку Кеңештин VII чакырылышынын депутаты Нуржигит Кадырбеков менен жолугушуу болуп өттү. Комендант Жакшылык кызы Асель тарабынан уюштурулган иш чаранын жүрүшүндө депутат студенттерге күчтүү таасир калтырды. Жолугушууга о.э. жатаканалардын менеджери Б.Шабданов, "Ак Демилге" фондунун төрагасы Мирлан Акматалиев,  "Дил-Мүрөк" адеп-ахлак борборунун жетекчиси Темирлан Акматов, ырчы Нарынбек Калбаев катышып, "Дил-Мүрөк" борборунун өкүлдөрү активдүү, жакшы окуган 3 студентке чакан белектерин тапшырышты.

2022-жылдын 10-январь күнү башкы имараттагы кичи жыйындар залында КУУнун ректору Канат Садыков Баткен районунун Кара-Бак айыл өкмөтүндө жайгашкан “Дөбө” орто мектебинин директору Тиллебай Курбанбековго 13 (он үч) компьютер, бир принтер жана бир интерактивдүү доскадан турган техникалык каражаттарды тапшырды.

2022-жылдын 3-январында Бөкөнбев көчөсү менен Жаш гвардия бульварынын кесилишинде жайгашкан кичи футбол аянтчасында №7-жатаканада жашаган балдар арасында жаңы жыл майрамына карата кичи футбол боюнча мелдеш болуп өттү. Ден-соолукту чыңдоо жана балдар арасындагы ынтымакты бекемдөө максатында өткөрүлгөн оюнга кабаттарда жашаган студенттерден куралган командалар катышып, 1-орунду 3-кабат, 2-орунду 4-кабат, ал эми 3-орунду 2-кабатта жашаган балдардын командалары ээлешти.

Урматтуу Улуттук университетинин окутуучу-профессорлору жана кызматкерлери! Сиздерди математика жана информатика факультетинин жалпы жамааты келе жаткан жаңы 2022-жыл менен чын жүрөктөн  куттуктайт! Жаңы жыл – эң сүйүктүү жана жаркын майрамдардын бири. Бул майрам баарыбызды жаңы үмүттөр, тилектер жана келечекке умтулууларыбыз менен бириктирип келген майрам.

Ректор Канат Садыковдун 2021-жылдын 30-декабрь күнү кол койгон №452-буйругуна ылайык, 2022-жылдын 3-январы, 7-январы (Рождество) Кыргыз улуттук университетинин кызматкерлери үчүн эс алуу күндөрү, ал эми 4, 5, 6 - январы - иш күндөрү болуп жарыяланды. Аталган буйрук Кыргыз Республикасынын Эмгек кодексинин 113-беренесинин негизинде чыгарылды.

2021-жылдын 29-декабрында Ломоносов атындагы Москва мамлекеттик университетинин Азия жана Африка өлкөлөрү институту уюштурган «Запад-восток: общенаучные подходы к познанию востока» деген илимий-методикалык семинар онлайн-форматта болуп өттү. Семинардын спикери Санк-Петербург мамлекеттик университетинин профессору, тарых илимдеринин доктору Турсун Султанов болду. Аталган иш чарага Россия, Казахстан, Кыргызстан, Өзбекстан ж.б. өлкөлөрдөн 120дай окумуштуу катышты.

Өлкөбүздөгү бараандуу жалпыга маалымдоо каражаттарынын бири болгон “Де Факто” коомдук саясий газетасы жыл мыктыларын аныктап, жыйынтыгында “Жылдын мыкты университети” наамы Жусуп Баласагын атындагы Кыргыз Улуттук университетине ыйгарылды. Басылмада белгиленгендей окуу жайдын быйылкы жыл ичиндеги жетишкендиктери, бир канча оңдоп түзөө иштери жана илимий багытта көп ийгиликтерди жараткандыгы анык. 2021-жыл ичинде окуу жай бир канча эл аралык мааанидеги илимий иш чараларды өткөргөндүгү эске алынып жыл мыктысы боло алды.

2021-жылдын 29-декабрь күнү "Ак демилге" коомдук фондунун мүчөсү Мирлан Акматалиев №7- жатаканадагы студенттер менен жолугушуп, аталган фонддун планы менен тааныштырды. Анын айтымында, фонд студенттик илимий иш-чараларга колдоо көрсөтөт. Жатаканын коменданты менен студенттик кеңештин мүчөлөрү алдыда аткарыла турган иш чаралардын планы, жобосу менен тааныштырып, студенттер Мирлан Акматалиевге өз сунуштарын айтып, суроо узатышты.

2021-жылдын 29-декабрында матфактын 1-курс студенттери кыргыз тилчи Гүлзина Элтузерова менен биргеликте оңдоп-түзөө иштеринен кийин ачылган тарых музейине барып, кыдырып эле көрүп чыкпастан, заманбап  техниканын мүмкүнчүлүктөрүнө жараша реконструкцияланган ажайыпканадан интерактивдүү ыкмалардын жардамы менен ар кыл доорлордогу окуяларды, кубулуштарды, этнографиялык маалыматтарды өздөштүрүп, уздар менен усталардын колунан чыккан буюм-тайымдарды көрүп, толкунданып, таасирленип келишти.

2021-жылдын 28-декабрь күнү Кааба уулу Кожомкул атындагы Спорт сарайында жылдын мыкты спортчууларын сыйлоо аземи болуп, маданият, маалымат, спорт жана жаштар саясаты министринин орун басары Канат Шабданбаев №7-жатаканын коменданты Жакшылык кызы Аселге жана бир катар студенттерге министрликтин ыраазычылык катын тапшырды.

"Web of Science" интернет-платформасында индекстелген "Қазакстан Республикасынын Улуттук илимдер академиясынын кабарчысы" журналында Кыргыз-европа факультетинин доценти А.А.Орозонованын "Digital currency of the central bank: risks and ways of globalization" деп аталган макаласы жарык көрдү. Маалымат үчүн билдире кетсек, А.А.Орозонованын РИНЦ боюнча Хирш индекси = 5, Web of Science боюнча Хирш индекси =1.

2021-жылдын 28-декабрында башкы имараттагы санариптик технологиялар борборунда Окумуштуулар кеңешинин кезектеги отуруму болуп өттү. Аталган кеңештин төрагасы, Улуттук университеттин ректору Канат Садыков алып барган жыйында "Окуу акысын төлөөдө студенттерге жеңилдиктерди берүү жөнүндө", "2021-жылкы кабыл алуу кампаниясынын жыйынтыгы жөнүндө" жана башка маселелер каралды.