2022-жылдын 29-ноябрьында башкы имараттагы чоң жыйындар залында көрүнүктүү окумуштуулар Абдыкул Жапаров менен Карбоз Дыйкановдун 100 жылдык мааракесине арналган «Профессорлор А.Жапаров, К.Дыйканов - улуттук тил илиминин залкарлары» аттуу эл аралык илимий- тажрыйбалык конференция болуп өттү. Кыргыз филологиясы факультети менен эл аралык мамилелер жана чыгыш таануу факультети тарабынан уюштурулган иш чараны кыргыз филологиясы факультетинин деканы Бактыбек Жайлообаев ачып, сөз кезегин КУУнун ректору Төлөбек Абдырахмановго берди.

Ректор конференциянын уюштуруучулары менен катышуучуларына ыраазычылык билдирип, Абдыкул Жапаров менен Карбоз Дыйканов агайлар кыргыз тили менен адабиятына абдан зор салым кошкон инсандар экенин белгиледи жана аларды көрбөй калган азыркы студенттер менен магистранттар үчүн бул иш чара өтө кызыктуу болоорун айтты.

Андан ары Төлөбек Абдырахманов Президенттин жарлыгы менен Улуттук университетке өзгөчө статустун берилиши менен окуу жайга чоң милдеттер жана жоопкерчилик жүктөлгөнүн, жарлыкты ишке ашыруу үчүн КУУнун жалпы жамааты, анын ичинде кафедралардын, факультеттердин студенттеринен баштап, окутуучу, декандарына чейинки бардык кызматкерлери козголуп, ойгонуп, өзгөчө көз караш менен башкача ой жүгүртүп, башкача иштеши зарыл экендигин белгиледи. - Эгер жамаат кыймылдабаса, эчтеке чыкпайт, бардыгы мурдагыдай кала берет. Психологиялык жактан да өзгөрүү керек. Улутттук университет изилдөөчүлүк багыттагы университет болуп, илимдин чордону болушу керек. Анткени, бизде илимий традиция жана потенциал бар.

Ректор андан ары кыргыз филологиясы факультетинин жамаатына намысты кайра колго алып, өнүгүү багыттары менен структуралык өзгөртүүлөрдү декан менен чогуу аныктап, сунуштарды Окумуштуулар кеңеши тарабынан түзүлгөн жумушчу топко берүү зарыл экендиги боюнча кайрылды жана өткөрүлүп жаткан конференциянын ишине ийгиликтерди каалады.

Профессорлор Абдыкул Жапаров менен Карбоз Дыйкановдун жөнүндө видео тасма көрсөтүлүп, илимий иштер боюнча проректор Назаркул Ишекеев куттуктоо сөзүн айткандан кийин, конференциянын пленардык жыйыны башталып, ф.и.д., профессор И.Абдувалиев “Жөнөкей суйлөмдүн маселелери А.Жапаровдун эмгектеринде”, УИАнын корр.-мүчөсү, ф.и.д., профессор Т.С.Маразыков “Тилчи-окумуштуу, профессор Карбоз Дыйкановдун емүрү жана чыгармачылыгы” жана ф.и.д., профессор К.Т.Жаманкулова “Профессор А.Жапаров - өз заманынын залкар окумуштуусу” аттуу баяндамаларды жасашты.