КУУдагы соңку жаңылыктар

Кыргыз радиосунда Манастаануу жана дүйнөлүк адабият кафедрасынын профессору, ф.и.д. Венера Акматова тарабынан кыргыз элинин XX-кылымдагы көрүнүктүү филолог-илимпозу, котормочу, драматург Тазабек Саманчиндин (1909–1979) жеке жана чыгармачылык тагдырына арналган берүү уюштурулду. Берүүгө анын кызы Саманчина Гулсана Тазабековна чакырылып, атасы тууралуу баяндап берди. Андан тышкары Т.Саманчиндин «Манас» эпосуна, Молдо Кылычка жана кыргыз адабиятынын башаттарына арналган изилдөөлөрүнө кенен баяндама берилди.

2021-жылдын 8-февраль күнү кыргыз филологиясы факультетинин түркология жана котормо таануу бөлүмүндө котормо жана котормо таануу адистиги боюнча студенттер арасында конкурс өткөрүлдү. Сынакка 1-курстан 5-курска чейинки студенттер катышып, англис тилиндеги мультфильмдерди кыргыз тилине которушуп, мыкты үлгүдөгү чыгармаларды жаратмандык менен иштеп чыгышты. Катышуучулар 3 номинация менен жарышка чыгышты.

2021-жылдын 13- февралында А.Осмонов атындагы Улуттук китепканада Кыргыз Республикасынын эмгек сиңирген артисти, театр жана кино актеру, обончу-композитор, аткаруучу Нурканбек Турсунбаевдин 80 жылдык мааракеси белгиленет. Маданият, маалымат жана туризм министрлигинин планына ылайык уюштурулуп жаткан иш чаранын алкагында “Көп кырдуу талант ээси Нурканбек Турсунбаевдин Кыргыз искусствосундагы тарыхый орду” аттуу илимий-практикалык конференция жана анын чыгармачылык жолуна арналган фото-көргөзмө өткөрүлөт.

2021-жылдын 29-январында КУУнун профессору, т.и.к. Омурова Жамыйкат Орозбековна 07.00.02 – Ата Мекен тарыхы жана 07.00.03 – Жалпы тарых адистиги боюнча "Тарых илимдеринин доктору" окумуштуулук даражасына талаптанып жазган "Кыргызстан жана Шанхай кызматташтык уюму: Тарыхый өнүгүү этаптары жана өзгөчөлүгү" деген темадгы диссертациялык ишин И.Арабаев атындагы КМУда ийгиликтүү коргоду.

2021-жылдын 26-январь күнү башкы имараттагы санариптик технологиялар борборунда кыргыздын алгачкы лексикографы, УИАнын ардактуу академиги Кусейин Карасаевдин 120 жылдыгына арналган "Даанышман баскан даңктуу жол" аттуу илимий-тажрыйбалык конференция болуп өттү. Кыргыз филологиясы факультетинин деканы Бактыбек Жайлообаев алып барган жыйынды мамлекеттик тил жана тарбия иштери боюнча проректор Садык Алахан (Тиллебаев) ачып, куттуктоо сөзүн айтты.

2021-жылдын 22-январь күнү кыргыз филологиясы факультетинин түркология жана котормо таануу бөлүмүнүн башчысы Бурул Элебесова Стамбулдагы Эркек лицейинин 11-классынын жана даярдоо бөлүмүнүн окуучуларына Манас эпосу боюнча онлайн-сабак өттү. Түрк тили жана адабияты мугалими Фуркан Бостанжынын демилгеси боюнча өткөрүлгөн. сабактын жүрүшүндө кызыктуу маалымат менен катар эпостон үзүндү айтылып, манасчылык өнөрдүн үлгүсү көрсөтүлүп, окуучулардын кунт коюп угуусу жана кызыгуусу менен өттү.

2021-жылдын 21-январында кыргыз филологиясы факультетинин түркология жана котормо таануу бөлүмүнүн окутуучулары Курамаева Ф.Н., Элебесова Б.Б. жана Тилабердиева С.Б., о.э. магистранттары менен студенттери Уфа шаарындагы М.Акмулла атындагы Башкыр мамлекеттик педагогикалык университети жана “Биз өзүбүз Башкыр” эл аралык илимий билим берүүчү интернет платформасынын доолбоорунун алкагында уюштурулган башкыр тилинин баштапкы курсунун 1-сабагына катышышты. 

2021-жылдын 21-январь күнү Кыргыз Республикасынын айыл чарба, тамак-аш өнөр жайы жана мелиорация министрлигинин жыйындар залында аталган министрлик менен Жусуп Баласагын атындагы Кыргыз улуттук университетинин жана Айыл чарбасы боюнча Кореянын эл аралык программасынын Кыргызстандагы борборунун (KOPIA) ортосундагы кызматташтык тууралуу Меморандумга кол коюу аземи болуп өттү.

2021-жылдын 20-январында тарых жана чөлкөм таануу факультетинин профессору Тынчтыкбек Чоротегин менен кыргыз филологиясы факультетинин профессору Назгүл Турдубаева Нарын облустук тарыхый-этнографиялык музейинде кыргыз элинин залкар окумуштуусу К.Карасаевдин туулган күнүнүн 120 жылдыгына карата болуп өткөн “Кусейин Карасаев - залкар инсан жана  улуу окумуштуу” аттуу республикалык илимий-тажрыйбалык конференцияга жана көргөзмөгө катышты.

2021-жылдын 14-январь күнү 6-окуу имаратында Факультеттер аралык компьютердик борбор ачылды. Аталган окуяга байланышкан иш чарага КУУнун ректору Канат Садыков, окуу иштери боюнча проректор Бекжан Темиров, академиялык саясат башкармалыгынын окуу процессин координациялоо бөлүмүнүн башчысы Лариса Курманалиева, факультет декандары жана түзүм жетекчилери катышты. Борбордун кире беришине тартылган кызыл лентаны ректор кескенден кийин, иш чаранын катышуучулары жаңыдан ачылган Борборго орнотулган компьютерлер менен таанышып чыгышты.

Бүгүнкү күндө ар бир кесипкөй журналисттин ишмердүүлүгүндө орун алган маалымат журналистикасы жождордогу журналисттик билим берүү процессине заманбап өзгөртүүлөрдү киргизүүнү талап кылууда. Тилекке каршы, маалымат базасынын негизинде жүргүзүлгөн журналисттик иликтөө Борбор Азиянын аймагында өзүнчө жанр болуп калыптана элек. Буга байланыштуу Аль-Фараби атындагы КазУУнун басма сөз жана электрондук ЖМК кафедрасы регионалдык интеграциянын процессин илгерилетүүнү пландоодо.

Узак жылдар бою билим берүү тармагында эмгектенип, жаш муундарга терең билим, татыктуу таалим-тарбия берип келе жаткандыгы үчүн факультеттер аралык дене тарбия жана спорт кафедрасынын ага окутуучусу Майрамбек Алдаяров Кыргыз Республикасынын Жогорку Кеңешинин Аппарат жетекчиси Алмазбек Сабырбековдун ыраазычылык катына татыктуу болду. Аталган катты сыйлык ээсине окуу иштери боюнча проректор Бекжан Темиров 2020-жылдын 30-декабрь күнү тапшырды.

2020-жылдын 29-декабрында учурдагы кырдаалдан улам түркология жана котормо таануу бөлүмүндө окутуучулар жана студенттер үчүн жаңы жылдык онлайн "Көгүлтүр от" өткөрүлдү. Иш чарага "Лингвистика", "Филология" багыттары жана "Котормо жана котормо таануу" адистиги боюнча билим алып жаткан студенттер катышты. Кечеде кыргыз, түрк, орус, англис тилдеринде каалоо тилектер айтылып, студенттер көркөм окуу, ырдоо, дилбаян окуу боюнча өз таланттарын тартуулашты.

2020-жылдын 29-декабрь күнү башкы имараттагы санариптик технологиялар борборунда Окумуштуулар кеңешинин кезектеги отуруму болуп өттү. Аталган органдын төрагасы, КУУнун ректору Канат Садыков алып барган жыйында өткөн окуу жылындагы мамлекеттик аттестация менен жайкы сессиянын жыйынтыктары, окуу куралдарына министрликтин грифин алуу, социологиялык лабораторияны кайра өзгөртүп түзүү, КУУнун Ош шаарындагы гуманитардык-табигый илимдер факультети менен ботаникалык бакчаны өнүктүрүү тууралуу маселелер каралып, окуу жайдын этика боюнча комиссиясынын жаңы курамы бекитилди.

COVID-19 пандемиясы учурунда өз ыктыяры менен жарандык позициясын көрсөтүп, илдетке чалдыкккандарга жардам берүү менен борбор шаардын жашоочуларына колдоо көрсөткөндүгү үчүн коомчулук менен байланышуу жана жаштар иштери боюнча департаменттин директору Каныбек уулу Ардакбек Бишкек шаарынын мэриясынын Ардак грамотасы менен сыйланды. Расмий документти 2020-жылдын 28-декабрында шаар башчынын м.а. Балбак Түлөбаев өзү тапшырды.

Мурда кабарлангандай, КУУнун 4-курс студенттери Асанбекова Ализа (педагогика факультети), Джолдошбекова Алтынай (тарых жана чөлкөм таануу факультети) жана Нурболот кызы Айгерим (журналисттика факультети) окууда, илимий-чыгармачыл жана коомдук иштерде айырмалангандыгы үчүн президенттик стипендияга татыктуу болушкан. Аталган сыйлыкты алар 2020-жылдын 25-декабрында Президенттин милдетин аткаруучу, Жогорку Кеңештин төрагасы Талант Мамытовдун өз колунан алышты.

2020-жылдын 24-декабрь күнү кыргыз тил илими кафедрасынын профессору К.Т.Жаманкулова Кыргыз улуттук илимдер академиясынын Ч.Айтматов атындагы тил жана адабият институтунда болуп өткөн “Кыргыз-башкыр фольклордук байланышы” аттуу эл аралык онлайн-конференцияга жана профессор И.Абдувалиевдин котормосундагы “Урал баатыр” китебинин бет ачарына катышып, “Башкырлардын жана кыргыздардын тарыхы жана жазуулары тууралуу” деген темада доклад жасады. 

2020-жылдын 24-декабрында кыргыз-түрк Анадолу кыздар кесиптик лицейинин директорунун орун басары Эржан Гүндогду мырза кыргыз филологиясы факультетинин деканы Бакыт Жайлообаев менен түркология жана котормо таануу бөлүмүнүн башчысы Бурул Элебесовага Түркиянын Кыргызстандагы Элчисинин билим берүү боюнча кеңешчиси Харун Каржы мырзанын атынан жаңы компьютер жана түрк тилиндеги китептерди тапшырып кетти.

Мамлекеттик тил боюнча проректор Садык Алахан (Тиллебаев) Орусия Федерациясынын Элге билим берүү министрлиги, Орусия билим берүү академиясы, М.Акмулла атындагы Башкортостан мамлекеттик педагогикалык университети тарабынан уюштурулуп, 14-18–декабрда Уфа шаарында болуп өткөн “Образование 3D: духовность, доминанты, достижения” деп аталган Улуттук педагогикалык форумга катышып, анын алкагында өткөрүлгөн “Духовный мир мусульманских народов. Гуманистическое наследие просветителей в науке, культуре и образовании” деп аталган илимий-тажрыйбалык конференциянын спикерлеринин бири болду жана пленардык жыйында “Первые акыны-просветители Кыргызстана” деп аталган 20 мүнөттүк илимий баяндама жасады.

Манастаануу жана дүйнөлүк адабият кафедрасынын башчысынын м.а., ф.и.д., профессор Венера Акматова 2020-жылдын 21,22-декабрь күндөрү DVV International Кыргызстан тарабынан уюштурулган «Образование взрослых в Кыргызстане: текущие вызовы и перспективы» деп аталган тегерек столго катышты. Иш чарада Кыргызстандагы квалификацияны жогорулатуу, кошумча кесипке үйрөнүү, «өмүр бою бир кесип» деген түшүнүктүн бүгүнкү доордогу эскире баштаганы, ар бир адамдын өмүр бою билим алуу зарылдыктары жана аны уюштуруунун жолдору тууралуу кызыктуу докладдар сунушталды.

2020-жылдын 17-декабрында Манастаануу жана дүйнөлүк адабият кафедрасынын башчысынын м.а., ф.и.д., профессор Венера Акматова Кыргыз радиосунун «Күн чубак» берүүсүнө катышып, КР эл акыны Шайлообек Дүйшеевдин чыгармачылыгын илимий талдоого алуу менен, акындын талантынын өзгөчөлүгү жана өмүр-тагдыры жөнүндө айтып берди. Мындан тышкары, ал кыргыз драматургиясынын өнүгүү тенденциялары, комедия жанрынын абалы, куудулдук өнөр тууралуу да кеӊири маалымат берди.

Өлкө башчысынын м.а. Талант Мамытовдун 2020-жылдын 17-декабрь күнү кол койгон буйругуна ылайык Кыргызстандын жогорку окуу жайларында окуп жаткан 70 студент президенттик стипендияга татыктуу болду. 50 миң сом өлчөмүндөгү стипендия алуучулардын арасында Улуттук университеттин да 3 студенти бар. Алар: Асанбекова Ализа - педагогика факультети, Джолдошбекова Алтынай - тарых жана чөлкөм таануу факультети жана Нурболот кызы Айгерим - журналистика факультети.

2020-жылдын 16-декабрь күнү кыргыз тил илими кафедрасынын профессору К.Т.Жаманкулова Билге Тонюкук жазма эстелигинин тургузулушунун 130 жылдыгына карата Кыргыз-Түрк “Манас” университети тарабынан  уюштурулган эл аралык онлайн-семинарга катышып, “Кыргыздар Тонукук жазма эстелигинде” деген темада доклад жасады. Иш чарага Түркия менен Кыргызстандын окумуштуулары катышты.

2020-жылдын 15-декабрында коомчулук менен байланышуу жана жаштар иштери боюнча департаменттин кызматкерлери университеттин окутуучулары менен студенттерине жаңы жылдык маанай тартуулоо максатында башкы имараттын биринчи кабатындагы фойеге бийиктиги 4 метр болгон балаты орнотуп, оюнчуктарды илип, чырактарын жандырышты. Анын айланасында кесиптик бирлик комитети тарабынан окуу жайдын кызматкерлеринин балдары үчүн Балаты майрамы да өткөрүлөт.