КУУдагы соңку жаңылыктар

2019-жылдын 20-декабрында башкы имараттагы чоң жыйындар залында Улуттук илимдер академиясынын корреспондент мүчөсү, философия илимдеринин доктору, саясий илимдердин доктору, профессор, КР илимине эмгек сиңирген ишмер, илим жана техника боюнча КР мамлекеттик сыйлыгынын ээси Артыкбаев Мэлс Табалдиевичтин 80 жылдыгына арналган "Экинчи саясий окуулар: теория жана практика" аттуу юбилейлик илимий конференция болуп өттү.

2019-жылдын 20-декабрында коомчулук менен байланышуу жана жаштар иштери боюнча департаменттин директору Каныбек уулу Ардакбек, аталган департаменттин тарбия бөлүмүнүн башчысы Касмакунов Ынтымак, координатору Коконбай кызы Акжолтой, вокалисти Мамырбай уулу Алымкул, №1-окуу имаратынын коменданты Субанбеков Касым жана математика жана информатика факультетинин деканынын тарбия иштери боюнча орун басары Рахманкулов Бактияр Бишкек шаардык мэриясынын Ленин райондук  администрациясынын ардак грамотасы менен сыйланышты.

Кыргыз улуттук университетинин кесиптик колледжинин кыргыз-кытай бөлүмүнүн мугалимдери билимдерин тереңдетип, педагогикалык квалификациясын жогорулатыпүү боюнча демилге көтөрүшүп, Кыргыз билим берүү академиясынын көчмө курсунан өтүштү. Жетимиш эки сааттык курс бүткөн соӊ, мугалимдер экзамен тапшырышып, 2019-жылдын 19-декабрь күнү тиешелүү сертификатка ээ болушту.

Окуу иштери боюнча проректор Бекжан Темиров 16-декабрда кол койгон №507-буйрукка ылайык, 2020-жылдын 2-январы 24-февралга, 3-январь 9-мартка, 6-январь 23-мартка, 4-май 11-майга которулуп, Улуттук университеттин кызматкерлери 1-7-январь жана 1-5-май күндөрү эс алышат. Аталган буйрук Кыргыз Республикасынын Эмгек кодексинин 113-беренесине ылайык жана КУУнун кызматкерлеринин эс алуу жана майрам күндөрүн рационалдуу пайдалануу максатында чыгарылды.

2019-жылдын 17-декабрында башкы имараттагы кичи жыйындар залында коомчулук менен байланышуу жана жаштар иштери боюнча департамент “Ыйык Ата Журт” коомдук жаштар фонду менен биргеликте белгилүү режиссер Сүйүн Откеев менен жолугушуу өткөрдү. Аталган фонддун стипендиаттары, волонтерлору жана КУУнун студенттери катышкан жыйында Сүйүн Откеев кыргыз киносу тууралуу көптөгөн кызыктуу маалыматтарды берип, студенттердин суроолоруна жооп берди.

2019-жылдын 17-декабрь күнү №6-окуу имаратынын 6-дарсканасында география, экология жана туризм факультетинин 80 жылдыгына арналган “Географиянын азыркы көйгөйлөрү” атуу илимий-практикалык конференция болуп өттү. Иш чаранын алкагында о.э. география илимине салым кошкон окумуштуулар Кулматов Темир Нурдиновичтин 80 жаш, Бараталиев Өмүрбек Бараталиевичтин 70 жаш мааракеси да белгиленип, жыйын өтүп жаткан дарсканага география илимдеринин кандидаты, доцент Өмүрзаков Садыбакас Өмүрзаковичтин ысымы ыйгарылды.

2019-жылдын 16-декабрында Кожомкул атындагы Спорт ордосунда Мамлекеттик тилдин 30 жылдыгына карата Мамлекеттик тил боюнча улуттук комиссия менен Улуттук жазуучулар союзу уюштурган “Тилим - менин тирегим” аттуу сынактын жеңүүчүлөрүнө сыйлык тапшыруу аземи болуп, поэзия жанры боюнча 1-орунду ээлеген педагогика факультетинин филологиялык билим берүү (англис тили) багытынын 4-курс студенти Нурлан кызы Бегайымга аталган комиссиясынын диплому, жаштар иштери жана спорт агенттигинин ардак грамотасы жана башка баалуу сыйлыктар тапшырылды.

2019-жылдын 16-декабрында коомчулук менен байланышуу жана жаштар иштери боюнча департаменттин кызматкерлери университеттин кызматкерлерине жаны жылдык маанай тартуулоо максатында башкы имараттын биринчи кабатындагы фойеге жаңы жылдын символу болгон 4 метрлик балатыны орнотуп, жандырышты. Анын айланасында кесиптик бирлик комитети тарабынан окуу жайдын кызматкерлеринин балдары үчүн уюштурган Балаты майрамы жана факультеттердин жаңы жылдык кечелери өткөрүлмөкчү.

2019-жылдын 15-декабрында "Нур-Суфра" эс алуу борборунда «Бир адамдан бир китеп» долбоорунун жыйынтыгы чыгарылып, иш чарага журналистика факультетинин студенттери активдүү катышты. Факультет деканынын орун басары Чынар Капарованын айтымында, факультеттин студенттик сенаты аталган долбоордун алкагында китеп топтоо жөрөлгөсүн мындан ары да улантып, чогулган китептер айыл аймактарындагы китепканаларга жеткирип турат. Көп окуган көптү билет!

2019-жылдын 13-декабрь күнү №5-окуу имаратындагы окуу залында Улуттук адабият күнүнө карата кыргыз филологиясы факультетинин студенттик кеңеши тарабынан уюштурулган “Адабият алптары Ч.Айтматов жана А.Осмонов” атуу интеллектуалдык оюн болуп өттү. Акыл таймашына 1-курс студенттери катышып, курамына факультет деканы Бакыт Жайлообаев, профессор, окутуучулар кирген калыстар тобу аларга Чыңгыз Айтматов менен Алыкул Осмоновдун чыгармалары боюнча суроолорду беришти. 

2019-жылдын 13-декабрында башкы имараттагы кичи жыйындар залында журналистика факультетинин мезгилдүү басма сөз кафедрасынын профессору Абдиламит Матисаковго "И.Арабаев атындагы Кыргыз мамлекеттик университетинин ардактуу профессору” наамын ыйгаруу аземи болуп, иш чарага КУУнун окуу иштери боюнча проректору Бекжан Темиров, И.Арабаев атындагы КМУнун окуу иштери боюнча проректору Тууганбай Коңурбаев, окуу башкармалыгынын башчысы Октябрь Капалбаев, “Ачык сөз” гезитинин башкы редактору Жора Сулайманов, факультеттин окутуучулары жана студенттери катышты.

2019-жылдын 13-декабрь күнү башкы имараттагы кичи жыйындар залында журналистика фаультетинин студенттери Жогорку Кеңештин депутаты Дастан Бекешов менен жолугушуп, эл өкүлү өзүнүн иш тажрыйбасы, маалымат таркатуудагы көйгөйлөр, фейк маалыматтар, хайп, тролли жөнүндө айтып берди. Жолугушуунун жүрүшүндө студенттер Кыргызстандын бүгүнкүсү жана келечеги тууралуу суроолорун узатышып, депутаттан пайдалуу жана кызыктуу маалыматтарды алышты.

2019-жылдын 12-декабрында кыргыз филологиясы факультетинини 2-курс студенти Эсенбеков Темирлан Улуттук адабият күнүнө карата  К.Карасаев атындыгы Бишкек гуманитардык университетинде өткөрүлгөн ЖОЖдор аралык “Ыр көктөм” поэзиялык сынагына  катышып, “Сага...” аттуу ырын көркөм окуу менен баш байгени жеңип алды. Кыргыз филологиясы факультетинин жалпы жамааты таланттуу студент Эсенбеков Темирланга чың ден соолук жана чыгармачылык ийгиликтерди каалайт!

Кесиптик колледждин кыргыз кытай бөлүмүнүн мугалими Айдана Эрмекбаева жаш жазуучулар арасында “РухЭш” сайты өткөргөн “Учур адабияттын жаӊы дүбүртү” сынагына “Жоктоо” аӊгемеси менен катышып, дипломго ээ болду. Сыйлык 2019-жылдын 12-декабрында Улуттук адабият күнүнө карата А.Токомбаевдин үй-музейинде өткөрүлгөн салтанаттуу иш чара учурунда тапшырылды. Кесиптешибиш Айдана Эрмекбаевага калеминин курчуй беришин каалайбыз!

2019 жылдын 12-декабрь күнү математика жана информатика факультетинде улуу жазуучу Чыңгыз Айтматовдун 91-жылдыгына карата "Адамзаттын мугалими Айтматов" темасында иш чара өткөрүлүп, студенттер "Саманчынын жолу", "Кылым карытар бир күн" чыгармаларынан эпизоддорду көрсөтүшүп, үзүндүлөрдү окушту жана Чыңгыз Айтматовго арналган ырларды аткарышты. Жыйындын экинчи бөлүгүндө улуу жазуучу тууралуу кызыктуу фактылар айтылды.

География, экология жана туризм факультетинин физикалык география кафедрасынын башчысы Алмагүл Кендирбаева Германияга илимий иш сапары менен барып келди. Сапардын жүрүшүндө ал Констанц, Фрайбург университеттеринде, Карлсруе шаарындагы илимий изилдөө борборунда, Йена шаарындагы экологиялык институтта жана Таранддагы Токой академиясында болуп, германиялык кесиптештеринин илимий изилдөөлөрү менен таанышып, студенттерге Кыргызстан жөнүндө айтып берди.

2019-жылдын 12-декабрында башкы имараттагы чоң жыйындар залында “Жаш күч“ коомдук бирикмеси, “Адекс интернэшнл“ курулуш компаниясы жана КУУнун коомчулук менен байланышуу жана жаштар иштери боюнча департаменти тарабынан уюштурулган “Акыл сааты” интеллектуалдык оюну болуп өттү. Үч турдан турган оюнга Бишкек шаарындагы ЖОЖ студенттеринен түзүлгөн 7 команда катышып, жыйынтыгында КУУнун “Баласагын” командасы 1-орунду багындырды.

2019-жылдын 12-декабрь күнү коомчулук менен байланышуу жана жаштар иштери боюнча департаменттин директору Каныбек уулу Ардакбек баштаган университеттин 21 факультетинин 80ден ашуун активист студенттери залкар жазуучу Чыңгыз Айтматовдун туулган күнүнө карата "Ата-Бейит" комплексине барып, улуу инсандын бейитине гүл  коюп, куран окуп келишти. Алар о.э. 1937-жылы репрессияда курман болгондорду да эскеришти.

2019-жылдын 11-декабрында журналистика факультетинин жарнама иши жана коомчулук менен байланыш кафедрасы башкы имараттагы чоң жыйындар залында улуу жазуучу Чыгыз Айтматовдун туулган күнүнө карата “Кызыл алма” сынагын өткөрдү. Иш чараны мамлекеттик тил жана тарбия иштери боюнча проректор Садык Алахан (Тиллебаев) куттуктоо сөзү менен ачкан соң, Алия Эдилова жетектеген “Genius» дизайн студиясы улуу жазуучунун чыгармаларындагы каармандардын кийимдерин элестеткен “Кылымдар жаңырыгы” аттуу коллекцияны көрсөттү.

2019-жылдын 11-декабрь күнү Улуттук китепканада "Кыргыз Республикасынын диний чѳйрѳдѳгү мамлекеттик саясатын ишке ашыруу боюнча иш-аракеттер планын" аткаруу максатында Кыргыз Республикасынын Дин иштери боюнча мамлекеттик коммисиясы тарабынан “Диндер аралык диалог” аттуу республикалык конференция өткөрүлүп, ага социалдык-гуманитардык илимдер факультетинин "Дин таануу жана теология“ кафедрасынын окутуучулары жана студенттери катышып келишти. 

2019-жылдын 10-декабрында Жогорку Кеңештин депутаты Маматалиев Марлен мамлекеттик жана муниципалдык башкаруу факультетинин студенттери менен жолугушуп, өзүнүн студенттик күндөрү, жетишкен ийгиликтери жөнүндө айтып, өлкөбүздүн өнүгүшүндө жаштардын орду өзгөчө экендигин баса белгиледи. Депутат о.э. студенттердин гранттык негизде чет өлкөлөдө окууу мүмкүнчүлүктөрү жөнүндө да кенен маалымат берди. Жолугушуу ачык дискуссия форматында уланып, студенттер өздөрүнүн кызыккан суроолорун берип, так жоопторду алышты.

2019-жылдын 10-декабрында №5-окуу имаратындагы 408-дарсканада профессор Нурбүбү Асипованын "Заманбап билим берүү парадигмалары" аттуу жаңы китебинин бетачары болду. Жыйынды социалдык-гуманитардык илимдер факультетинин деканы Камчыбек уулу Мырзабек ачып, бүгүнкү иш чаранын максаты - аталган китепти ЖОЖ окутуучуларына, илимий коомчулукка тааныштыруу экендигин айтты. Профессор Н.А.Асипованы жаныдан жарык көргөн китеби менен мамлекеттик тил жана тарбия иштери боюнча проректор Садык Алахан (Тиллебаев) куттуктады.

2019-жылдын 10-декабрь күнү кесиптик колледждин студенттери менен Алыкул Осмонов атындагы адабий сыйлыктын ээси, Кыргызстан Жазуучулар Союзунун мүчөсү, акын Бердибек Жамгырчиевдин жолугушуу кечеси болду. Кесиптик колледждин окутуучусу Адилет Самсалиев тарабынан уюштурулган иш чара 12-декабрда белгиленүүчү Улуттук адабият күнүнө жана кесиптик колледжде түзүлгөн “Жаш тилек” адабий ийриминин ачылышына арналды.

2019-жылдын 9-декабрында кесиптик колледжде «Заманбап педагогикалык технологияларды колдонуу - окуучуларга билим жана тарбия берүүнүн натыйжалуулугун жогорулатуунун каражаты катары» аттуу декаданын ачылышы болуп, анын алкагында «Педагогика ааламындагы омоктуу ойлор жана улуу педагогдордун иш тажрыйбалары» аттуу тегерек стол өткөрүлдү. Декада 15-декабрга чейин уланат.