Улуттук университеттеги соңку жаңылыктар

2023-жылдын 13-апрелинде Улуттук университеттин курамдык түзүмдөрүнүн учурдагы билим, илим, уюштуруучулук жана эл аралык байланыштар боюнча ишмердүүлүгүн баалоо максатында түзүлгөн программалык талдоо комиссиясынын мүчөлөрү кыргыз-кытай институту менен медицина факультетинде болушуп, аталган түзүмдөрдүн билим, илим, уюштуруучулук жана эл аралык байланыштар боюнча ишмердүүлүгүнө мониторинг жүргүзүштү. Өздөрү жетектеген институт менен факультетте жасалып жаткан иштер боюнча маалыматты комиссия мүчөлөрүнө аталган түзүм жетекчилери Софья Апаева менен Чынгыз Узакбаев беришти.

2023-жылдын 12-апрелинде кесиптик колледждин экономика жана финансы бөлүмүнүн физика мугалими Токсоналиева К.М. студенттердин физика сабагына болгон кызыгуусун арттыруу максатында “Физика сабагы боюнча студентердин чыгармачылык иштери” деген темада ачык сабак өткөрдү. Сабактын жүрүшүндө студенттер өздөрү жасаган “Герон фонтаны”, “Суу дөңгөлөктөрү”, “Гидравликалык кран”, “Роботтор моделдери”, “Өстүрүлгөн кант кристаллдары” сыяктуу эмгектери менен моделдерин көрсөтүштү. Мыкты аткарылган иштери үчүн студенттер грамоталар менен сыйланышты. Физика боюнча эксперименттер да жүргүзүлүп, БД-1-22 тобу Космонавтика күнүнө карата кабинетти жасалгалашты.

2023-жылдын 12-апрель күнү башкы имараттагы чоң жыйындар залында социалдык-гуманитардык илимдер институтунун социология жана социалдык иштер кафедрасы тарабынан "Демография, үй-бүлө жана иденттүүлүк маселелери социалдык-гуманитардык илимдердин айдыңында" аталышындагы жогорку окуу жайлар аралык студенттердин республикалык II Социологиялык симпозиуму өткөрүлдү. Студенттердин жана магистранттардын илимге болгон кызыгуусун  арттыруу максатында уюштурулган иш-чарага Кыргыз улуттук университетинин, Бишкек мамлекеттик университетинин жана Кыргыз-Турк "Манас "университетинин студенттери катышты. 

2023-жылдын 12-апрелинде Улуттук университеттин курамдык түзүмдөрүнүн учурдагы билим, илим, уюштуруучулук жана эл аралык байланыштар боюнча ишмердүүлүгүн баалоо максатында программалык талдоо жүргүзүү боюнча түзүлгөн комиссиянын мүчөлөрү журналистика факультетинде болушуп, аталган түзүмдүн билим, илим, уюштуруучулук жана эл аралык байланыштар боюнча ишмердүүлүгүнө мониторинг жүргүзүштү. Отурумдун башында окуу иштери боюнча проректор Эрлан Базарбаев мониторинг ректордун буйругунун негизинде жүргүзүлүп жатканын айтып, комиссиянын максаты - аталган багыттар боюнча факультеттер менен институттардагы реалдуу абалды, жетишкендиктер менен көйгөйлөрдү билүү экендигин жана комиссия топтогон материал боюнча отчет даярдалып, анын негизинде Окумуштуулар кеңеши тарабынан чечимдер кабыл алынаарын белгиледи.

2023-жылдын 12-апрель күнү математика жана информатика факультетинин академик А.А.Бөрүбаев атындагы алгебра, геометрия, топология жана жогорку математиканы окутуу кафедрасында болуп өткөн илимий-методикалык семинарда педагогика илимдеринин кандидаты, доцент Мунапысова Гульнара Ташматовна “Педагогикалык практиканын шартында студенттердин проекттик ишмердүүлүгү” темасында илимий доклад жасады. Баяндамада болочок математика мугалимдеринин чыгармачыл потенциалын өнүктүрүүгө, изилдөөчүлүк компетенцияларын калыптардырууга өзгөчө көңүл бурулуп, студенттердин таанып билүүнүн жалпы жана атайын методдору жана аларды математиканы окутууда колдонуунун мыйзам ченемдүүлүктөрү тууралуу кеңири түшүнүккө ээ болушун камсыз кылуу зарыл экендиги белгиленди.

Мамлекеттик тилди КУУда жайылтуу жана мамлекеттик тил аркылуу билим берүүнүн сапатын жогорулатуу максатында жыл сайын окуу жылынын аягында ѳткѳрүлүүчү мониторинг уланууда. 2023-жылдын 10-апрелинде мамлекеттик тил жана социалдык иштер боюнча проректор, мониторинг жүргүзүү боюнча комиссиянын тѳрагасы Садык Алахан баштаган комиссия тарабынан журналистика жана коммуникация институтунун кафедраларынын ички иш кагаздары, жумушчу программалары, ОМК, протоколдору жана илимий иштер каралды.  Жалпысынан алганда, кафедралардын иш кагаздары мамлекеттик тилде жазылып жатканы байкалды. Институттун эки кафедрасы иш кагаздарын, жумушчу программаларын жакшы деңгээлде даярдаганын кѳрсѳтүштү. Жарнама жана коомчулук менен байланыш кафедрасы кийинкиге калтырылды.

2023-жылдын 12-апрелинде физика жана электроника факультетинде Кыргыз Республикасынын билим берүүсүнө эмгек сиңирген кызматкер, КУУнун ардактуу профессору, быйыл 90 жылдыгы белгиленип жаткан Маамет Койчумановду жана КУУнун доценти, педагогика илимдеринин кандидаты, Кыргыз Республикасынын билим берүүсүнүн мыктысы Майлыбашева Чолпонду эскерүү кечеси болуп өттү. Иш чарага КУУнун ректору Төлөбек Абдырахманов, Улуттук аттестациялык комиссиянын төрайымы Бакыт Тыналиева, физиканы окутуу технологиялары жана табият таануу кафедрасынын башчысы, УИАнын корр.-мүчөсү, п.и.д., профессор Эсенбек Мамбетакунов жана башка коноктор катышты.

2023-жылдын 11-апрель күнү Улуттук университеттин курамдык түзүмдөрүнүн учурдагы билим, илим, уюштуруучулук жана эл аралык байланыштар боюнча ишмердүүлүгүн баалоо жана алардын «Жогорку кесиптик билим берүү уюмдарынын потенциалын жана атаандаштыкка жөндөмдүүлүгүн жогорулатуу боюнча чаралар жөнүндө» Кыргыз Республикасынын Президентинин жарлыгын ишке ашырууга  мүмкүнчүлүктөрү менен аткаруу багыттарын аныктоо максатында программалык талдоо жүргүзүү боюнча түзүлгөн комиссиянын мүчөлөрү кыргыз-европа факультети менен эл аралык мамилелер жана чыгыш таануу факультетинде болушуп, аталган түзүмдөрдүн билим, илим, уюштуруучулук жана эл аралык байланыштар боюнча ишмердүүлүгүнө мониторинг жүргүзүштү.

2023-жылдын 11-апрелинде башкы имараттагы санариптик технологиялар борборунда “Ааламдашуу жана технологиялык чакырыктар алкагындагы жождордун билим берүү көйгөйлөрү” аттуу тегерек стол болуп өттү. Социалдык-гуманитардык илимдер институтунун жогорку мектептин педагогикасы кафедрасы тарабынан уюштурулган иш-чараны аталган кафедранын башчысы Нурбүбү Асипова ачып, тегерек столдун максаты жана күн тартиби тууралуу билдирүү жасаган соң, сөз кезегин КУУнун ректору Төлөбек Абдырахмановго берди. Ректор иш-чаранын уюштуруучу тобуна, анын чакыруусун кабыл алып, убакыт таап, ой-сунуштарын айтуу үчүн келген күн тартибиндеги маселенин күңгөй-тескейинин баарын билген адис эже-агайларга ыраазычылык билдирди жана тегерек столдун темасы абдан маанилүү экендигин белгиледи. 

Жаштар саясаты жана тарбия иштери боюнча бөлүм Улуттук университеттин аз камсыз болгон 22 кызматкеринин үй-бүлөсүн жана муктаждыгы бар 40тан ашык студенттерди керектүү азык-түлүк менен камсыздашты. Аталган долбоорду  Голландиядагы түрк ишкерлери тарабынан түзүлгөн “IHHNL» жана Кыргызстандагы “Ак демилге” коомдук фонду каржылап, кызматкерлердин ыраазычылыгын алышты. Эскерте кетсек, аталган бөлүмү буга чейин дагы окуу жайдын аз камсыз болгон кызматкерлерине, мүмкүнчүлүгү чектелген студентерге, о.э. Баткен окуясында жабыр тарткан үй-бүлөлөрдүн балдарына көмөк көрсөтүшкөн.

2023-жылдын 10-апрелинде химия жана химиялык технология факультетинин студенттери менен окутуучулары залкар жазуучу Чынгыз Айтматовдун үй-музейине экскурсияга барып келишти. Алар музейдеги ашкана, конок, уктоочу, иштөөчү бөлмөлөр, Чынгыз Айтматов колдонгон ар кандай буюмдар, кийимдер, китептер менен таанышып, жазуучунун бала чагынан өмүрүнүн акыркы күндөрүнө чейинки сүрөттөрдү, көптөгөн кызыктуу буюмдарды жана картиналарды көрүштү. Экскурсия студенттерге да, окутуучуларга да кызыктуу жана пайдалуу болду.

2023-жылдын 10-апрель күнү Бишкек шаарындагы Кожомкул атындагы спорт сарайында Кыргыз Республикасынын маданият, маалымат, спорт жана жаштар саясаты министрлигинин алдындагы дене тарбия жана спорт департаменти тарабынан жаштар арасында дене тарбия менен спортту кенен жайылтуу жана өнүктүрүү максатында Кыргызстандын жогорку окуу жайларынын студенттери үчүн уюштурулган Универсиаданын ачылыш аземи болуп өттү. Спорттун 17 түрү боюнча өтө турган студенттик мелдешке Улуттук университеттин да студенттери катышууда. Универсиада 28-апрель күнү жыйынтыкталат.

2023-жылдын 10-апрель күнү КУУнун ректору Төлөбек Абдырахманов окуу жайдын курамдык түзүмдөрүнүн учурдагы билим, илим, уюштуруучулук жана эл аралык байланыштар боюнча ишмердүүлүгүн баалоо жана алардын «Жогорку кесиптик билим берүү уюмдарынын потенциалын жана атаандаштыкка жөндөмдүүлүгүн жогорулатуу боюнча чаралар жөнүндө» Кыргыз Республикасынын Президентинин жарлыгын ишке ашырууга  мүмкүнчүлүктөрү менен аткаруу багыттарын аныктоо максатында программалык талдоо жүргүзүү боюнча түзүлгөн комиссиянын мүчөлөрү менен жолугушуп, аталган комиссиянын максаты жана иштөө багыттары тууралуу айтып берди.

2023-жылдын 8-9-апрель күндөрү Улуттук университеттин оңдоп-түзөө жана калыбына келтирүү участогунун кызматкерлери ишембилик өткөрүштү. Алар башкы имараттын алдындагы эстеликтер коюлган скверге тосмо орнотушуп, ошол эле башкы имараттын фойесинен 2-кабатка көтөрүлгөн тепкичтин каршысындагы университет курулган 1951-жылдан бери турган эски жыгач терезелерди жаңы, жарык, темир каркастан жасалган терезелерге алмаштырышты жана блогерлердин сүйүктүү темасына айланган башкы имараттын артындагы спорт аянтчасын иретке келтиришип, мурдатан жаңы бордюр тизилген тилкеге арчанын көчөттөрүн отургузуп, кара топурак чачып, газон чөбүн себишти.

2023-жылдын 6-апрелинде жаштар саясаты жана спорт департаментинин кызматкерлери студенттик кеңештин мүчөлөрү менен биргеликте 2010-жылдын 7-апрель күнү элдик төңкөрүштө шейит кеткен маркумдарды эскерүү максатында Ата-Бейит мемориалдык комплексине барып келишти. Иш-чаранын алкагында жаштар иштери жана тарбия бөлүмүнүн башчысы Каныбек уулу Ардакбек студенттерге репрессия курмандыктары жана 7-апрель окуясы тууралуу айтып берди. КУУнун жаштары маркумдарга багыштап куран окуп кайтышты.

5-апрель күнү 7-жатаканада жашаган студенттер Кыргыз улуттук академиялык драма театрына барып, “Таазим” аттуу спектеклдин бет ачаарына күбө болуп келишти. 6-апрелде Бишкек шаарындагы китепканалардын бириндеги акын, жазуучу, прозаик Жыпара Исабаева менен жолугушуга катышты. 7-апрель күнү ишембиликке чыгышты. 8-апрелде жатаканын жыйындар залында студенттер үчүн кино көргөзүлдү. 9-апрель күнү Максимум бизнес борборундагы Жогорку Кеңештин депутатты Нуржигит Кадырбеков жана журналист Мансур-Бек Канназар менен болгон жолугушууга катышты.10-апрель жатакана студенттери ар бир бөлмөгө жарамазан айтып, жатакананы шаңга бөлөштү.

Мамлекеттик тилди КУУда жайылтуу жана мамлекеттик тил аркылуу билим берүүнүн сапатын жогорулатуу максатында жыл сайын окуу жылынын аягында ѳткѳрүлүүчү мониторинг уланууда. 2023-жылдын 3-апрелинде мамлекеттик тил жана коомдук иштер боюнча проректору, мониторинг жүргүзүү боюнча комиссиянын тѳрагасы Садык Алахан баштаган комиссия тарабынан математика жана информатика, география, экология жана туризм факультеттеринин кафедраларынын ички иш кагаздары, жумушчу программалары, ОМК, протоколдору жана илимий иштер каралды. 

2023-жылдын 5-апрелинде социалдык-гуманитардык илимдер институтунда “Кыргыз Республикасынын Конституциясынынын кабыл алынгандыгынын 30 жылдыгын майрамдоого даярдык көрүү жөнүндө» Министрлер Кабинетинин 2023-жылдын 3-мартындагы №112-токтомун аткаруу максында социология жана социалдык иштер каферасынын доценти Батма Кошбакова социалдык иштер багындагы 2-курс студенттерине “Кыргыз Республикасынын Конкституциясынын тарыхы” боюнча лекциялар циклин баштады. Сабакта Кыргыз Республикасынын Конкституциясынын тарыхы, президенттик жана парламенттик башкаруу формалары каралды.

2023-жылдын 5-апрель күнү Улуттук университетте улуу жазуучу, Кыргыз Республикасынын Эл баатыры Чыңгыз Айтматовдун 95 жылдыгына арналган мамлекеттик тил боюнча VII студенттик олимпиада болуп ѳттү. Иш-чарага окуу жайдын 1-2-курсунда окуган студенттер катышты. Олимпиаданын жобосуна ылайык, жыйынтыктоочу таймашка ар бир факультеттен алдын ала тандоодон ѳткөн 3төн студент катышып, "Дил баян жазуу", "Долбоор коргоо" жана "Сахналаштырылган композиция" номинациялары боюнча ат салышты.

2023-жылдын 5-апрелинде математика жана информатика факультетинин студенттери "Ата-Бейит" мемориалдык комплексине барып, cталиндик репрессияда, Апрель окуясында каза болгон баатырлардын жана Чыӊгыз Айтматовдун арбагына куран окутуп келишти. Мындан 13 жыл мурда болгон окуяда Улуттук университеттин МжИ факультетинин ага окутуучусу М.Жумаев менен СжГИ факультетинин ага окутуучусу Ж.Кудайбергенов курман болгон. Аталган комплекстин экскурсоводу 1937-жылы сталиндик репрессияга кабылган кыргыз интеллигенциясынын өкүлдөрү тууралуу айтып берди. 

2023-жылдын 4-апрель күнү башкы имараттагы чоң жыйындар залында Окумуштуулар кеңешинин кезектеги отуруму болуп өттү. Аталган кеңештин төрагасы, Улуттук университеттин ректору Төлөбек Абдырахманов алып барган жыйында негизги маселе катары "КУУнун эл аралык мамилелеринин абалы жана келечеги", "2022-2023-окуу жылына карата кышкы кабыл алууда тапшырган абитуриенттер боюнча маалымат", о.э. ар түрдүү башка маселелер каралды. 

КУУнун ректору Төлөбек Абдырахмановдун 2023-жылдын 29-мартындагы буйругу менен мамлекеттик жана муниципалдык башкаруу факультетинин экономиканы мамлекеттик жөнгө салуу кафедрасынын доценти Кадыр уулу Алмазбек 2023-жылдын 1-апрелинен тартып Улуттук университеттин жаштар саясаты жана спорт боюнча департаментинин директору болуп дайындалды. Жаңы жетекчини аталган түзүмдүн жамаатына 2023-жылдын 3-апрель күнү окуу иштери боюнча проректор Эрлан Базарбаев тааныштырды. Ал Кадыр уулу Алмазбек тууралуу ректордун буйругун окуп берди жана жаны жетекчи менен департаменттин жамаатына ийгиликтерди каалады.

2023-жылдын 31-мартында күнү кесиптик колледждин студенттери окутуучулар Г.А.Жалилова, А.С.Саадаева жана котормо иши бөлүмүнүн бөлүм башчысы Н.К.Куртубаеванын жетекчилиги астында Кыргызстан эл аралык университети тарабынан уюштурулган “Жаштар субмаданияты” аталышындагы ЖОЖдор аралык студенттик конференцияга катышып, жогорку деӊгээлдеги көрсөткүчтөрдү көрсөтүшүп, 1,2,3-даражадагы дипломдорго татыктуу болуп, колледждин атынан татыктуу катышкандыгы үчүн жетекчилик тарабынан сертификаттар жана белектер менен сыйланышты. Конференцияга катышуу менен студенттер келечектеги илимий изилдөө иштерине эшик ачып, башка катышуучулардын эмгектери менен таанышууга жана билим куржунун толтурууга мүмкүнчүлүк алышты.

2023-жылдын 31-март күнү №6-окуу имаратындагы футбол талаасында “Декандын кубогу” үчүн маалыматтык жана инновациялык технологиялар факультетинин 1-4 курс студенттеринин арасында кичи-футбол боюнча турнир өткөрүлдү. Оюнга 12 команда катышып жыйынтыгы төмөндөгүдөй болду: 1-орун: 1-курс (гр. ИВТ-22), 2-орун: 1-курс (гр. БИ-22), 3-орун: 3-курс (гр. ИСТ-20). Турнирдин «Мыкты чабуулчусу» болуп 1-курс студенти Таштемиров Эрзат (гр. ИВТ-1-22), "Мыкты коргоочусу" болуп 3-курс студенти Рыскулов Аслан (гр. ИСТ-1-20), ал эми "Мыкты дарбазачысы" болуп 1-курс студенти Амантаев Актан (гр. БИ11-21) аталды.