Улуттук университеттеги соңку жаңылыктар

Германиянын Франкфурт-на-Майне шаарында жыл сайын өткөрүлүүчү "Frankfurter Buchmesse" дүйнөлүк ири китеп көргөзмөгө Гүлжамал Жаманкулованын китептери катышып, “Байыркы кыргыз тили” аттуу китеби көргөзмөнүн алтын медалына татыктуу болду жана китептин аннотациясы көргөзмөнүн каталогуна жарыяланды. Аталган көргөзмө китептерди, илимди жайылтуу, автордук укуктарды колдонуу жана лицензияларды алуу боюнча дүйнөдөгү эң маанилүү платформа. 5 күндүн ичинде көргөзмөгө 100дөн ашык өлкөдөн 7 000 экспонент, 300 000 адам катышкан.

2022-жылдын 24-февралында кыргыз филологиясы факультетинин кыргыз тили жана адабияты кыргыз тилинде окутулбаган билим берүү мекемелеринде кафедрасынын доценти Эмил Акунов КТАОМ-1-19 группасы менен биргеликте “Манастын уулу Семетей” аттуу драмалык сахна-сабагын өткөрдү. Аталган сабак №5-окуу имаратынын Манас өргөсүндө болуп, группанын студенттери актёрдук чеберчилигин көрсөтүштү жана өздөрүнө бөлүнгөн ролдорду жогорку деңгээлде аткарганга аракет кылышты.

2022-жылдын 24-февраль күнү экономика факультетинин финансы кафедрасынын ага окутуучусу Ж.Шералиева мамлекеттик тилде даярдалган «Мыкты лекция», «Мыкты практикалык сабак» сынагынын алкагында “Мамлекеттин бюджеттик системасы” темасында ачык сабак өттү. Ачык сабакка мамлекеттик тил боюнча проректор Садык Алахан (Тиллебаев), факультет деканы Эркин Кулова, мамлекеттик тил бөлүмүнүн башчысы Динара Мырзагулова жана академиялык саясат башкармалыгынын окуу процессин координациялоо бөлүмүнүн адиси Төлөбаева Фарида катышты.

2022-жылдын 22-февралында педагогика факультетинин мектепке чейинки, мектеп педагогикасы жана билим берүү технологиялары кафедрасынын ага окутуучусу Асылгүл Жуматаева мамлекеттик тилде даярдалган «Мыкты лекция», «Мыкты практикалык сабак» сынагынын алкагында педагогика бвгытындагы 4-курс студенттерине «Башталгыч мектептерде окуу, жазуу жана предметтерди интеграцияланган жана дифференцияланган окутуу» дисциплинасынан «Текст предмет менен тилди интеграциялап окутууда кеп ишмердүүлүгүн өнүктүрүү үчүн негиз катары» темасында ачык практикалык сабак өттү.

Математика жана информатика факультетинин жалпы жамааты тарбия иштери боюнча декандын орун басары Бактияр Рахманкуловду Кыргыз Республикасынын Президентине караштуу Мамлекеттик тил боюнча улуттук комиссиясынын Төш белгисине ээ болушу менен чын жүрөктөн куттуктап, ага чыӊ ден соолук, мындан ары да албан-албан чыгармачыл ийгиликтерди каалайт. Бактияр Зулпукаровичтин бүгүнкү сыйлыгы талашсыз, анткени 1999-жылдан баштап азыркы күнгө чейин, т.а. 23 жыл бою декандын тарбия иштери боюнча орун басары кызматын үзгүлтүксүз түрдө аркалап, факультеттеги иш чаралардын баарын кыргыз тилинде жогорку денгээлде өткөрүп келет.

Билим берүү жана илим министрлигинин 2022-жылдын 20-январындагы 50/1 жана Дене тарбия жана спорт департаментинин 2022-жылдын 17-январындагы 4-Н буйруктарынын негизинде жогорку окуу жайлардын кызматкерлери арасында өткөрүлгөн «Ден соолук – 2022» спартакиадасында Улуттук университеттин намысын коргоого активдуу катышкандыгы жана спортко болгон сүйүү менен сергек жашоонун үлгүсүн мыкты көрсөтүп келгендиги үчүн КУУнун волейбол боюнча кыз-келиндер командасы ректордун ыраазычылыгына ээ болуп, грамота менен сыйланды. Алар бул жеңишин Ж.Баласагын атындагы Кыргыз улуттук университетинин 90 жылдыгына арнашты.

2022-жылдын 22-февраль күнү №7-жатаканада Ата-Мекенди коргоочулар күнүнө карата "Мыкты мырза" сынагы болуп, мелдешке ар бир кабаттан 2ден студент катышты. Алар "Дефиле", "Саламдашуу", "Үй тапшырмасы", "Суроо-жооп", "Пародия", "Күтүлбөгөн тапшырма", "Балдар ашканада" жана "Спорттук таймаш" деген тапшырмаларды аткарышты. Сынакты курамына жатаканалар боюнча менеджер Бексултан Шабданов (төрага), жатакана вахтерлору Гүлайым Осмонкулова, Эркингүл Кенешова, жатаканын маданият секторунун башчысы Орозбек Каримов жана комендант Жакшылык кызы Асель кирген калыстар тобу баалашты.

Мурда кабарлангандай, социалдык-гуманитардык илимдер факультетинин “Педагогика жана психология” багытынын 1-курс студенти Жусупова Салтанат Эне тилдин эл аралык күнүнө карата мамлекеттик тил бөлүмү тарабынан уюштурулган «Сабаттуу бол» жат жазуу сынагында англис тили боюнча 1-даражадагы диплом менен сыйланган. 2022-жылдын 22-февралында факультет деканы Камчыбек уулу Мырзабек сынактын уюштуруучуларына жана Жусупова Салтанатка жалпы факультеттин жамаатынын жана жеке өзүнүн атынан ыраазычылыгын билдирип, өткөрүлгөн иш чара жаштарды китеп окууга, сабаттуу жазууга үндөө максатын көздөй тургандыгын, о.э. жарандардын тилди билүү деңгээли канчалык жогору болсо, коомдун интеллектуалдык жана рухий маданияты ошончолук өсөөрүн белгилеп, Салтанатка ийгиликтерди каалады.

23-февраль — Мекенге кызмат кылуунун, аскердик эрдикти, муундардын ажырагыс байланышын жана аскердик духтун уландысын чагылдырган эң сонун  майрам. Бул майрамда туруктуулуктун жана баатырдыктын, аскердик жеңиштердин жана бийик адеп-ахлактык, патриоттук идеалдардын символу болуп, өз Мекенин душмандардын кол салууларынан коргогон бардык жоокерлердин элесине таазим этебиз жана урматтайбыз. Алардын арасында каргашалуу Баткен окуясында мамлекетибиздин эгемендүүлүгүн, коопсуздугун коргоп, курман болгон аскер кызматкерлери бар. Биз ар бир жылдардагы солдат жана матрос, сержант жана старшина, мичман жана прапорщик, офицер, генерал жана адмирал катары армияда, флотто жана авиацияда ийгиликтуу кызмат өтөп, Мекен алдындагы өз ыйык аскердик милдетин татыктуу аткарышкан мекендештерибиз менен сыймыктанабыз.

2022-жылдын 22-февраль күнү математика жана информатика факультети №6-окуу имаратындагы 115-дарсканасында Ата Мекенди коргоо күнүн белгилеп, иш-чарага куралдуу күчтөрдүн полковниги Айтбаев Жоошбай катышты. Ал Кыргызстандын Куралдуу күчтөрүнүн түзүлүшү, заманбап аскердик курал-жарактар менен куралдануусу, аскердик түзүмдөрү, эл аралык кызматташтыгы, окуу жайлары, ошондой эле офицерлерди даярдоо негизинен Россиянын, Казакстандын, Азербайжандын, Түркиянын жана Кытайдын аскер мектептердинде жүргүзүлөрүн айтып берди.

"Liber Madrid - 2021" китеп-көргөзмөсү Испаниянын билим берүү жана кесиптик даярдоо министрлигинин, маданият жана спорт министрлигинин, о.э. Мадрид шаардык кеңешинин расмий колдоосу менен өткөрүлгөн. Иш чаранын алкагында бизнес жолугушуулар, китеп презентациялары, тегерек столдор, лекциялар, талкуулар оффлайн режимде да, көргөзмөнүн бизнес-платформасын колдонуу менен онлайн режимде да болгон. Көргөзмөнүн стенддеринде коюлган материалдар менен китеп басып чыгаруунун, илим жана билим берүүнүн 10 000ден ашык адистери таанышкан. Көргөзмөнү дүйнөнүн бардык булуң-бурчунан 130дан ашык маалымат каражаттары чагылдырган.

КУУнун ректору Канат Садыковдун 2022-жылдын 21-февралында кол койгон №57-буйругуна ылайык 23-февраль - Мекенди коргоочулардын күнү Кыргыз Республикасынын Эмгек кодексинин 113-беренесинин негизинде Жусуп Баласагын атындагы Кыргыз улуттук университетинин кызматкерлери үчүн эс алуу күнү болуп жарыяланып, административдик-чарба иштери боюнча проректорго майрам күнүндө университеттин өрт коопсуздугун, мүлкүн жана материалдык баалуулуктарынын сакталышын камсыздоо үчүн атайын кызматтардын нөөмөт жүгүртмөсүн бекитүү тапшырылды.

2022-жылдын 21-февралында башкы имараттагы чоң жыйындар залында кыргыз филологиясы факультетинин студенттери тарабынан уюштурулган интеллектуалдык оюн жана Ата Мекенди коргоочулар күнүнө карата факультеттин кыздары тарабынан даярдалган чоң программадагы концерт өткөрүлдү. Алгач, факультеттин ар бир группасынан түзүлгөн командалар арасында кыргыз тили жана адабияты боюнча интеллектуалдык оюн болуп, андан соң факультеттин жалпы мырзаларын куттуктап, кыздар жамааты тарабынан уюшулган концерт тартууланды. Иш чара факультет деканы Б.Жайлообаев менен кыргыз тили жана адабияты кыргыз тилинде окутулбаган билим берүү мекелеринде кафедрасынын башчысы Э.Акуновдордун куттуктоо сөздөрү менен башталды. 

2022-жылдын 21-февраль күнү Эне тилдин эл аралык күнүнө карата мамлекеттик тил бөлүмү тарабынан уюштурулган «Сабаттуу бол» жат жазуу сынагыны жыйынтыгы чыгарылып, жеӊүүчүлөрдү сыйлоо аземи болуп өттү. Иш-чараны мамлекеттик тил жана тарбия иштери боюнча проректор Садык Алахан (Тиллебаев) куттуктоо сөзү менен ачып берген соң, КР Президентине караштуу Мамлекеттик тил жана тил саясаты боюнча улуттук комиссиянын жетектөөчү адиси Кутмырза Жакыбалиев математика жана информатика факультетинин деканынын орун басары Бахтияр Рахманкуловго аталган комиссиянын “Кыргыз тили” төш белгисин, ал эми факультеттер аралык мамлекеттик тил кафедрасынын ага окутуучусу Гүлзина Элтузеровага “Ардак грамотасын” тапшырды.

2022-жылдын 18-февралында кесиптик колледждин кыргыз-кытай бөлүмүнүнүн окутуучусу Айнабаева А.К. 2-курстар арасында “Котормонун кыргыз тилине тийгизген таасири” атту темада тегерек стол өткөрдү. Иш чара окутуучунун алгы сөзү менен башталып,  студенттердин көркөм окуу жана баяндоолору менен уланды. Баяндоолордо “Көркөм котормо”, “Кыргыз тилинин коомдогу статусун көтөрүү”, “Синхрондук котормо” жана башка темалар каралды. Жыйындын жүрүшүндө о.э. студенттер тарабынан орус тилинен кыргызчага которулган “Простоквашинодогу кыш” (ПДо-1-20 группасы), “Башкатырма” (ПДо-3-20) жана “Фиксики” (ПДо-2-20) аттуу мультфилимдер көрсөтүлдү.

2022-жылдын 18-февраль күнү кыргыз тилчи Гүлзина Элтузерова математика жана информатика факультетинин 1-курстары менен биргеликте 21-февраль – Эне тилдин эл аралык күнүнө карата майрамдык иш-чара өткөрдү. Студенттердин мекен алдындагы жоопкерчилигин арттыруу, атуулдук сезимдерин ойготуу, эне тилин сүйүүгө, сактоого умтулуу жана ар түрдүү шык-жөндөмдөрүн өстүрүү максатында уюштурулган жыйында белгиленип жаткан дата тууралуу маалымат берилди. Иш-чаранын чакырыгы: Келгиле студенттер, баарыбыз биргеликте дүйнөдө теңдеши жок алп “Манастай” дастандарды жараткан эне тилибизди сактоого өз салымыбызды кошолу!

2022-жылдын 18-февралында кыргыз филологиясы факультетинин кыргыз тил илими кафедрасы №5-окуу имаратындагы Манас өргөсүндө 21-февраль – Эне тилдин эл аралык  күнүнө карата “Эне тил – улуттун көөнөрбөс мурасы” аттуу семинар-тренинг өткөрдү. Иш-чара мамлекеттик тил жана тарбия иштери боюнча проректор Садык Алахандын куттуктоо сөзү менен ачылды. Андан кийин КР Президентине караштуу Мамлекеттик тил жана тил саясаты боюнча улуттук комиссиянын жетектөөчү адиси К.Жакыбалиев факультеттин айрым профессор-окутуучуларына аталган комиссиянын “Төш белгисин” жана Ардак грамотасын тапшырды.

2022-жылдын 17-февралында кыргыз-кытай факультетинин ага окутуучусу, PhD доктор Токсоналиева Асель «Мыкты лекция», «Мыкты практикалык сабак» сынагынын алкагында “Кытай диалектилери” темасындагы практикалык сабагын өттү. Иш чарага комиссиянын төрагасы, мамлекеттик тил жана тарбия иштери боюнча проректор Садык Алахан (Тиллебаев), мүчөлөрү: кыргыз-кытай факультетинин деканы Софья Апаева, мамлекеттик тил бөлүмүнүн башчысы Динара Мырзагулова, академиялык саясат башкармалыгынын билим берүүнүн сапаты бөлүмүнүн башчысы Гүлнара Бузурманкулова жана окуу процессин координациялоо бөлүмүнүн адиси Фарида Төлөбаева катышты.

2022-жылдын 17-феварлында кесиптик колледжде Германиянын эл аралык кызматташтык коому (GIZ) жана CAMP Алатоо коомдук фондунун колдоосу менен «Мугалимдердин методикалык даярдыгы» аттуу семинар-тренинг өткөрүлдү. Тренерлер К.Джунушалиева менен Г.Шамкановалар педагогика жана социалдык иш бөлүмүнүн окутуучуларына «Туруктуу өнүгүү жана биологиялык ар түрдүүлүктү сактоо боюнча билим берүү» темасынын алкагында практикалык сабактарды өтүшүп, курстун аягында ар бир катышуучуга тиешелүү сертификат жана методикалык колдонмолор тапшырылды.

2022-жылдын 15-февраль күнү башкы имараттагы кичи жыйындар залында маданияттын эмгек сиңирген ишмери, "Даңк" медалынын ээси Гүлшан Молдоева журналистика факультетинин студенттерине мастер-класс өттү. Кыргыз телевидениесине, радиосуна 40 жылдан ашык өмүрүн арнаган адис дикторлук кесипке кантип келгени, эмгек жолундагы жетишкендиктери, өйдө-ылдый көрүнүштөр тууралуу айтып берди. Жолугушууда студенттер өздөрүнүн суроолорун беришип, татыктуу жоопторду алышты. Гүлшан Молдоева о.э. болочок журналисттерге өзүнүн кеп-кеңештерин берип, мыкты адис болуу талыкпас эмгекти талап кылаарына токтолуп, көп-көп китеп окуш керектигин баса белгиледи.

2022-жылдын 14-февраль күнү экономика факультетинде студенттик сенаттын демилгеси менен уюштурулган "Билгим келет" интеллектуалдык сынагы болуп өттү. Студенттердин коомдук иштердеги активдүүлүгүн жогорулатуу жана билимге болгон кызыгуусун арттыруу максатында өткөрүлгөн акыл таймашына 1-курстун студенттеринен түзүлгөн 5 команда катышты. Сынакта “Өнүккөн өлкөлөрдүн экономикага тийгизген оң жана терс таасири” темасы боюнча суроолор берилип, туура жооп берген командаларга упайлар ыйгарылып жатты. "Үй тапшырмасы" боюнча даярдалган презентацияларга да баа берилди.

Мамлекеттик тилде даярдалган «Мыкты лекция», «Мыкты практикалык сабак» сынагы уланууда. 2022-жылдын 10-февралында башкаруу жана бизнес факультетинин доценти, э.и.к. Керимбекова Дуйшекан Осмоналиевна аталган сынактын алкагында “Продукциянын сапатын камсыз кылууга таасир этүүчү факторлор жана шарттар” темасында 3-курстун студенттерине ачык лекция окуду. Сабакка мамлекеттик тил жана тарбия иштери боюнча проректор Садык Алахан (Тиллебаев), мамлекеттик тил бөлүмүнүн башчысы Динара Мырзагулова, факультет деканы Меримкуль Керимкулова, академиялык саясат башкармалыгынын окуу процессин координациялоо бөлүмүнүн адиси Фарида Төлөбаева катышты.

2022-жылдын 10-февралында математика жана информатика факультетинде өлкөбүздүн жаштар арасында болуп өткөн бокс боюнча мелдештин вице-чемпиону болгон 1-курс студенти Берди кызы Санирабига жана анын машыктыруучусу, дене тарбия жана спорт кафедрасынын ага окутуучусу, бокс боюнча спорттун чебери Кубаныч Боронбаев менен жолугушуу болуп өттү. Иш-чаранын жүрүшүндө факультет деканы Изат Усенов куттуктоо сөзүн айтып, Санирабиганын мындай ийгиликтерге жетишине машыктыруучусу Кубаныч Капаровичтин эмгеги зор экендигин баса белгиледи.

2022-жылдын 10-февраль күнү КУУнун ректору Канат Садыков окуу жайдын Көзөмөлчүлүк кеңешинин төрагасы Бабыржан Төлбаев менен жолугушту. Ректор менен төрага Улуттук университетти өнүктүрүүнүн айрым багыттарын талкуулашты. Бабыржан Төлбаев ректорго буга чейин активист студенттер менен болгон жолугушуулар, ал жыйындарда каралган маселелер тууралуу маалымат берип, өзү менен чогуу келген Лозанна университетинин бизнес жана экономика факультетинин профессору Рустамжан Хакимовду тааныштырды.