Улуттук университеттеги соңку жаңылыктар

2022-жылдын 10-февраль күнү башкы имараттагы санариптик технологиялар борборунда Окумуштуулар кеңешинин кезектеги отуруму болуп өттү. Аталган кеңештин төрагасы, Улуттук университеттин ректору Канат Садыков алып барган жыйында "КУУдагы илимий-изилдөө иштеринин 2021-жылдагы жыйынтыгы жана илимий-изилдөө иштеринин өнүгүшүндөгү перспективалар", "КУУнун окумуштууларынын доктордук диссертацияларынын темасын бекитүү жөнүндө" жана башка маселелер каралды.

2022-жылдын 9-февралында М.В.Ломоносов атындагы Москва университетинин Азия жана Африка өлкөлөрү институту, Мирзо Улукбек атындагы Өзбекстан улуттук университети, Ташкент мамлекеттик Чыгыштаануу университети, Мамлекеттик Чыгыш музейи биргеликте Россиядагы Азербайжан Республикасынын элчилигинин, Россиядагы Өзбекстан Республикасынын элчилигинин, Россиядагы Гейдар Алиев фондунун өкүлчүлүгүнүн жана Эл аралык Түрк академиясынын колдоосу менен “От Низами до Навои: времен связующая нить” аттуу эл аралык илимий-практикалык конференцияны онлайн форматта өткөрүштү.

Адистиктердин бардык түрү боюнча мамлекеттик тилде билим берүүнүн жана мамлекеттик тилди окутуунун сапатын жогорулатуу максатында КУУнун мамлекеттик тил бөлүмү тарабынан 2021-2022-окуу жылынын февраль–апрель айларына окутуучу-профессордук курам арасында мамлекеттик тилде даярдалган “Мыкты лекция” жана “Мыкты практикалык сабак” сынагы жарыяланган. Сынактын графиги Университеттин сайтында жарыяланган, ал эми өткөрүү тартиби жөнүндөгү жобо ар бир факультетке таратылып, декандар менен окуу иштери боюнча декандын орун басарларына маалымдалган.

2022-жылдын 7-февралында №7-студенттик жатаканада "Билим багыты" деп аталган, 4 турдан турган акыл таймаш оюну өткөрүлдү. Калыстар тобунун курамына "Биригели" коомдук бирикмесинин жетекчиси Азамат Баяманов (төрага), жатаканалар боюнча менеджер Бексултан Шабданов, кесиптик колледждин тарых мугалими Бекжан Бейшембаев жана тарбия иштери боюнча координатор Таалайбек кыз Бегимай кирди. Акыл таймашта студенттер өздөрүнүн жигердүүлүгүн, билгичтигин, мыкты даярдыгын көрсөтө алышты. Оюндун жыйынтыгында "Манас" командасы биринчи, "Мурас" командасы экинчи жана "Билим" командасы үчүнчү орунду ээлеп, тиешелүү даражадагы  диплом жана китептер менен сыйланышты. Орун албай калган командаларга дипломдор тапшырылды.

Кыргыз Республикасынын Президентине караштуу Мамлекеттик тил жана тил саясаты боюнча улуттук комиссиянын (мындан ары – Улуттук комиссия) 2021-жылдын 11-ноябрындагы №91 буйругу менен түзүлгөн атайын жумушчу тобу 2021-жылдын 22-ноябрынан 26-ноябрына чейин Жусуп Баласагын атындагы Кыргыз улуттук университетиндеги иш кагаздарынын жүргүзүлүшү, мамлекеттик тилдеги иш кагаздарынын сабаттуулугу жана жалпы эле мамлекеттик тилдин абалы менен таанышып чыккан. Үстүбүздөгү жылдын 1-февралында Улуттук комиссиянын “Жусуп Баласагын атындагы Кыргыз улуттук университетиндеги мамлекеттик тилдин абалы боюнча Маалымат каты” келип түштү.

2022-жылдын 3-февраль күнү башкы имаратынын алдындагы аянтчада коомдук жана мамлекеттик ишмер, окумуштуу жана педагог, техника илимдеринин доктору, профессор, Улуттук илимдер академиясынын академиги, илим жана техника боюнча Кыргыз ССРинин Ленин комсомолу сыйлыгынын лауреаты, “Ардак белгиси” орденинин ээси Советбек Жайлообекович Токтомышевди акыркы сапарга узатуу зыйнаты болду. Маркумдун сөөгү аянтчанын ортосундагы секичеге орнотулган соң, КУУнун ректору Канат Садыков аза күтүү митингин ачып, коомдук жана мамлекеттик ишмер, окумуштуу-педагог, техника илимдеринин доктору, профессор, академик Советбек Жайлообекович Токтомышевдин 1-февраль күнү 79 жашында катуу ооруунун кесепетинен жарык дүйнөдөн кайтышы менен мамлекетибиздин илим жана билим берүү коомчулугу, Кыргыз улуттук университетинин жалпы жамааты чоң жоготууга учураганын белгиледи.

2022-жылдын 1-февралында КУУнун эмканасынын врач-гинекологу Айнура Ибраева математика жана информатика факультетинин студенттери үчүн «Омикрон канчалык коркунучтуу?» деген темада лекция өттү. Анын айтымында, үч ай мурда коронавирустун аябай мутация болгон варианты аныкталган. Аны Дүйнөлүк саламаттык сактоо уюуму «тынчсызданткан вариант» деп белгилеп, ага «Омикрон» деген аталыш ыйгарган. Коронавирустун бул варианты алгач Түштүк Африка Республикасында катталып, мурдагы варианттар грек тамгалары менен «альфа», «бета» деп аталса, бул штамм «омикрон» деп белгиленди.

Кыргыз Республикасынын илими, билим берүүсү, атпай журт орду толгус чоң жоготууга учурады. Узакка созулган оорудан кийин коомдук жана мамлекеттик ишмер, окумуштуу жана педагог, техника илимдеринин доктору, профессор, КР Улуттук илимдер академиясынын академиги, илим жана техника боюнча Кыргыз ССРинин Ленин комсомолу сыйлыгынын лауреаты, “Ардак белгиси” орденинин ээси Советбек Жайлообекович Токтомышев 79 жашында көз жумду.

Өткөн 2021-жылы 30-апрелден 2-майга чейин Баткен жергесинде тажиктер менен болгон кандуу кагылышта жапа чеккен элдин социалдык абалын жакшыртууга көмөк көрсөтүү максатында Жусуп Баласагын атындагы Кыргыз улуттук университетинин профессордук-окутуучулар курамы, жалпы эле кызматкерлери бир күндүк эмгек маяналарын топтошкон. КР Билим берүү жана илим министри Б.Д.Купешов сентябрь айында Баткен облусуна болгон иш сапарында жардамга муктаж мектептерде болуп, натыйжада, КУУнун кызматкерлери тарабынан топтогон 1 (бир) миллион сом өлчөмүндөгү бир күндүк эмгек маяналарын даректүү түрдө жардам көрсөтүү үчүн Тажикстан менен чектешкен Дөбө айлындагы “Дөбө” орто мектебин окуу жайыбыздын жетекчилигене сунуштаган.

Педагогика факультетинин филологиялык жана социалдык экономикалык билим берүү кафедрасынын окутуучулары 2022-жылдын 24-25-январында чет тилдер факультети жана чет тилдер мугалимдеринин ассоцациясы биргеликте уюштурган тренинге, ал эми 26-27-январда мамлекеттик тил бөлүмү уюштурган "Тилдерди кесиптик багытта окутуунун технологиялары" аталышындагы семинар-тренинге активдүү катышып, көп пайдалуу жана кызыктуу маалыматтарды алышты.

2022-жылдын 26-27-январында башкы имараттагы чоң жыйындар залында Кыргыз улуттук университетинин 90 жылдыгына арналган “Тилдерди кесиптик багытта окутуунун технологиялары” аталышындагы семинар-тренинг  болуп өттү. Мамлекеттик тил бөлүмү тарабынан уюштурулган иш чараны мамлекеттик тил жана тарбия иштери боюнча проректор Садык Алахан (Тиллебаев) ачып, окуу иштери боюнча проректор Бекжан Темиров куттуктоо сөзүн айтты.

2022-жылдын 27-январь күнү эрте мененки саат 10до 8-окуу имаратындагы конференц-залда 2020-жылдын 13-ноябрында президенттин м.а. Садыр Жапаровдун №39-жарлыгы менен бекитилген "Кыргыз жараны" концепциясын ишке ашыруу максатында мамлекеттик жана муниципалдык башкаруу факультети тарабынан уюштурулган "Жарандык иденттүүлүктү өнүктүрүү саясаты жана практикасы" аттуу тренинг башталды. Жыйынга Чүй областынын мамлекеттик жана муниципалдык башкаруу органдарында иштеген кызматкерлер катышууда.

2022-жылдын 25-январында Асанбек Табалдиев атындагы социо-маданий  социологиялык изилдөөлөр борборунда “Кыргыз коомун социалдык туруксуздуктардын шарттарында чыңдоонун социалдык технологиялары: жаштар мисалында” деген темада фокус–топтук тегерек стол болуп өттү. Иш чарада жаштардын коомдогу көйгөйлөрү талкууланып, өлкөдөгү социалдык-экономикалык жана маданий  маселелердин коомдун социалдык абалына тийгизген таасирлери эске алынышы керектиги айтылды.

2022-жылдын 23-январь күнү Каба уулу Кожомкул атындагы спорт ордосунда Кыргыз Республикасынын бокс боюнча жаштар арасындагы чемпионаты аяктады. 20-январда башталган мелдешке республиканын бардык аймактарынан жана Бишкек, Ош шаарларынан 19 салмактык категория боюнча 140 мушкер катышты. Чемпионатка №7-жатаканада жашаган Берди кызы Санирабига  да катышып, 60кг. салмактык категорияда экинчи орунду ээледи.

2022-жылдын 24-январь күнү башкы имараттагы конференц-залда КУУнун көзөмөлчүлүк кеңешинин төрагасы, "М Булак" микрокредиттик холдингинин башкы директору Бабыржан Төлбаев кыргыз-кытай факультетинин активист студенттери менен жолугушуу өткөрдү. Төрага Улуттук университеттин өнүгүүсүнүн айрым багытары жана аларды ишке ашыруунун жолдору тууралуу айтып берди. Бабыржан Лотихановичтин айтымында, Кыргыз улуттук университети - азыркы учурда өлкөнүн көрүнүктүү жогорку окуу жайларынын бири. Биз аны мындан да жакшы, мындан да күчтүү университетке айландырышыбыз керек! Ал үчүн студенттерден жана кызматкерлерден турган "стратегиялык команда"  түзүп, бүткүл "энергияны" бир жерге топтоп, керектүү тарапка багытташыбыз абзел.

2022-жылдын 24-январында кыргыз тилчи Элтузерова Гүлзина кышкы эс алуу учурунда матфактын 1-курсунун айылга барбай, шаарда эс алып жаткан студенттери менен бирге маданий агартуучулук максатында Т.Сатылгановдун музейине барып, Токтогулдун башка замандаш акындардан жана комузчу-төкмөлөрдөн айырмасы - ал универсалдуу, б.а. көп кырдуу таланттын ээси болгонуна күбө болуп келишти. Ал теңдешсиз акын, улуу комузчу, шаңшыган ырчы, саясий идиреги өтө күчтүү ойчул, санатчы, төкмө, куудул болгондугун, Токтогулду Токтогул кылган, атын кылымга калтырган чыгармалар - анын дүйнө, өмүр жөнүндөгү классикалык саптары, адам баласынын бу жарык дүйнөдөгү бийик вазипасы, асыл наамы, милдети тууралуу ырлары, эл-жер тууралуу термелери, насыяттары, тууган жердин турпагын сагынгандагы кербездери, ботойлору, кайрыктары экендигин музейдин кызматкери жеткиликтүү баяндап берди.

2022-жылдын 21-январь күнү башкы имараттагы санариптик технологиялар борборунда министрликтин буйругу менен түзүлгөн Улуттук университеттин көзөмөлчүлүк кеңешинин биринчи отуруму болуп өттү. Жыйында уюштуруу маселелери каралып, добуш берүүнүн жыйынтыгында аталган кеңештин төрагасы болуп "М Булак" микрокредиттик холдингинин башкы директору Төлбаев Бабыржан Лотиханович шайланды, ал эми кеңештин катчысы милдетин Эл аралык республикалык институттун Кыргыз Республикасындагы өкулчүлүгүнүн программалык координатору Бактыбек уулу Айдин аткармай болду.

"Кыргыз Республикасынын Билим берүү жана илим министрлигинин 2021-жылдын 8-сентябрындагы №1514/1–буйругу менен бекитилген "Ведомстволук сыйлыктар жөнүндө жобонун" жаңы редакциясынын талаптарына ылайык "Жусуп Баласагын атындагы Кыргыз улуттук университетинин сыйлыктары жөнүндөгү жобого" да айрым өзгөртүүлөрдү киргизүү зарылдыгы пайда болду", - деп айтылат КУУнун кызматкерлерине сыйлык берүү боюнча комиссиянын сунуштамасында.

Факультеттер аралык ”Ден cоолук-2022” спартакиадасында стол тенниси, волейбол, стритбол жана тогуз коргоол боюнча турнир болуп өттү. Математика жана информатика факультетинин аталган спорттун түрлөрү боюнча курама командасы атаандаштарын артта калтырып, теннис, волейбол, стритбол жана тогуз коргоол боюнча Улуттук университеттин чемпиону аталды. Факультет жамааты өз командасын бул ийгилик менен чын жүрөктөн куттуктап, мындан аркы спорттук жеңиштерди каалайт.

2022-жылдын 15-январында 6-окуу имаратындагы спорт залда "Ден соолук" спартакиадасынын ачылышы болуп, окуу иштери боюнча проректор Бекжан Темиров баардык спорт сүйүүчүлөрүн ден соолук майрамы менен куттуктады. Андан кийин футбол боюнча турнир өткөрүлүп, административдик жана чарба иштери боюнча проректор Туратбек Суранаев жеңүүчүлөрдү куттуктап, "Эң мыкты оюнчу" деп табылган кесиптик колледждин  оюнчусу Жандос Айдаралиевге акчалай сыйлык берилээрин билдирди.

2022-жылдын 13-январында Жусуп Баласагын атындагы Кыргыз улуттук университетинин профессордук-окутуучулар курамынын жана кызматкерлеринин арасында өтүп жаткан факультеттер аралык «Ден соолук-2022» спартакиадасынын алкагында волейбол боюнча таймаш болуп, педагогика факультетинин волейбол боюнча кыз-келиндер командасы 2-орунду камсыз кылышты. Ал эми 1-орунду математика жана информатика факультетинин курама командасы ээледи.

2022-жылдын 13-январында тарых илимдеринин кандидаты, профессор Кубат Табалдиев Кыргыз-Түрк «Манас» университетинде археологиялык изилдөөлөрдүн жүрүшү» аттуу темада окуу-усулдук семинар өттү. Тарых жана чөлкөм таануу факультети уюштурган иш чарага И.Арабаев атындагы КМУнун, Кыргыз-Түрк «Манас» университетинин , ОшМУнун, БатМУнун, ТалМУнун, С. Нааматов атындагы НМУнун, К.Тыныстанов атындагы ЫМУнун,  Борбор Азиядагы Америка университетинин ж.б. жогорку окуу жайлардын окумуштуулары, магистранттары жана студенттери, о.э. Улуттук тарых музейи баш болгон региондордогу баардык музейлердин кызматкерлери да катышты.

2022-жылдын 10-январь күнү М.В.Ломоносов атындагы Москва мамлекеттик университетинде «Монгольская империя: ее роль в истории и судьба наследия и наследников» аттуу илимий-методикалык онлайн-семинар болуп өттү. МУУнун Азия жана Африка өлкөлөрү институту тарабынан уюштурулган иш чарага КУУнун профессорлору Памира Кадырбекова, Нурлана Ахметова жана кыргыз филологиясы факультетинин магистранттары А.Жекшеналиева, А.Алтынбекова, Н.Боркошев, Рахман кызы Эркайым, М.Калыбекова, А.Кыдыңова Г.Надырбекова жана Ж.Шаршенбаевалар катышты.

2022-жылдын 11-январында №7-жатаканада Жогорку Кеңештин VII чакырылышынын депутаты Нуржигит Кадырбеков менен жолугушуу болуп өттү. Комендант Жакшылык кызы Асель тарабынан уюштурулган иш чаранын жүрүшүндө депутат студенттерге күчтүү таасир калтырды. Жолугушууга о.э. жатаканалардын менеджери Б.Шабданов, "Ак Демилге" фондунун төрагасы Мирлан Акматалиев,  "Дил-Мүрөк" адеп-ахлак борборунун жетекчиси Темирлан Акматов, ырчы Нарынбек Калбаев катышып, "Дил-Мүрөк" борборунун өкүлдөрү активдүү, жакшы окуган 3 студентке чакан белектерин тапшырышты.