Жусуп Баласагын атындагы Кыргыз улуттук университетинин Юридикалык институту өз студентинин жогорку жетишкендиги тууралуу сыймыктануу менен билдирет. Республикалык сынактын жыйынтыгы боюнча институттун студенти Дүйшоналиев Рысбек Нурланович жеңүүчү аталып, «Кыргызстандын мыкты студенти» ардактуу наамына ээ болду.
Сынак өлкөнүн бардык аймактарынан эң демилгелүү жана таланттуу студенттердин башын бириктирди. Иш-чаранын уюштуруучулары катары «Кыргызстан жаштар кыймылы», «Кыргызстан жаштар конгресси» жана «Keremet Holding» компаниясы чыгышты.
Жеңишке карай жол эки татаал этаптан турду:
- Тандоо этабы (октябрь): Республиканын бардык жогорку окуу жайларын камтыды. Тандоонун негизги критерийлери катары окуудагы жетишкендиктер, илимий иштер, эл аралык платформаларга катышуу жана коомдук активдүүлүк каралды.
- Чыгармачыл-аналитикалык этап: Катышуучулар укук жана коомдун актуалдуу маселелери боюнча баяндамаларды жана эсселерди даярдашты. Мында өзгөчө басым ойдун оригиналдуулугуна жана автордук долбоорлордун практикалык маанилүүлүгүнө жасалды.
Рысбек Дүйшоналиев окуу мезгилинде өзүнүн терең укуктук даярдыгын жана жоопкерчиликтүү жарандык позициясын көрсөтө алды. Сынактын жүрүшүндө ал өзүнүн илимий иштеп чыгууларын жана кесиптик чөйрөнү өнүктүрүү боюнча демилгелерин сунуштап, лидерлик сапаттарын далилдеди.
«Бул жеңиш — системалуу иштин, тартиптин жана кесиптик өсүүгө болгон умтулуунун татыктуу натыйжасы», — деп белгилешет Юридикалык институттун жетекчилиги жана профессордук-окутуучулук курамы.
Финалдык этап жана жеңүүчүлөрдү сыйлоо аземи 2025-жылдын 28-декабрында Бишкек шаарындагы Технопарктын жыйындар залында өттү. Салтанаттуу иш-чарада илимге жана коомдун өнүгүшүнө салым кошкон алдыңкы студенттер сыйланышты.
Ж. Баласагын атындагы КУУнун Юридикалык институту Рысбекти бул триумфалдык жеңиши менен чын жүрөктөн куттуктайт! Мындан аркы окууларында, илимий иштеринде албан-албан ийгиликтерди жана жаркын кесиптик жолду каалайбыз.
(С) Бакова А.Б. — тарбия иштери боюнча директордун орун басары
