2025-жылдын 31-август күнү Жусуп Баласагын атындагы Кыргыз улуттук университетинде Кыргыз Республикасынын Эгемендүүлүк күнүнө арналган салтанаттуу иш-чара болуп өттү.
Башкы имараттын фойесине чогулган колледждер менен орто кесиптик билим берүү бөлүмдөрүнүн студенттерин, окутуучуларын жана жетекчилерин өлкөбүздүн эң улуу майрамы менен КУУнун ректору, профессор Догдурбек Чонтоев куттуктады.
Ал 31-август – кыргыз элинин кылымдар бою эңсеп келген улуу тилегинин ишке ашкан күнү, бул күн – мамлекеттүүлүгүбүздүн, эркиндигибиздин жана жаңы доорго кадам таштаганыбыздын символу, эгемендүүлүк – чоң мүмкүнчүлүк жана чоң жоопкерчилик экендигин белгилеп, Жусуп Баласагын атындагы Кыргыз улуттук университети эгемендүүлүк жылдарында да, ага чейинки тарыхый этаптарда да өзүнүн улуу миссиясын так аткарып келгенине токтолду. Ректордун айтымында, быйылкы жылы университетке кабыл алынган студенттер – 100 жылдык мааракеге туш келген, жаңы кылымдык тарыхын баштап жаткан муун. – Сиздер университеттин жаңы кылымдык тарыхын баштап жаткан муун катары билимге, илимге жана чыгармачылыкка умтулууңуздар менен Мекенибиздин келечегине зор салым кошосуздар. “Улуттук университеттин студенти” деген статуска татыктуу болуп, татыктуу билим аласыздар деп ойлоймун. Анткени, сиздердин ар бир ийгилик – бул Улуттук университеттин да, эгемендүү Кыргызстандын да ийгилиги. Эгемендүүлүк бизди ынтымакка, биримдикке жана жаратмандыкка чакырат. Биз биргелешкен аракетибиз менен өлкөбүздү өнүктүрүп, университетибизди дүйнөлүк билим берүү мейкиндигинде тааныткан жаңы бийиктиктерге жетебиз. Эгемендүүлүгүбүз түбөлүк болсун! Улуу майрамыбыз кут болсун!, – деди Догдурбек Чонтоев.
Майрамдык салтанат Улутттук университеттин таланттуу жаштары тарабынан даярдалган чакан концерттик программа менен коштолду.
