2025-жылдын 28-августунда Кытайдын Циндао шаарында илим, билим, соода, экономика жана маданиятты комплекстүү өнүктүрүү боюнча форум болуп өттү.
Иш-чарага ондон ашык өлкөнүн, о.э. Кытайдын Тышкы иштер министрлигинин, Кытайдын Билим берүү министрлигинин өкүлдөрү жана Циндао шаарынын жетекчилиги катышты.
Форумдун алкагында Шанхай Кызматташтык Уюмунун биргелешкен изилдөө борборун түзүү боюнча келишимге кол коюлду. Документке Жусуп Баласагын атындагы Кыргыз улуттук университетинин ректору, профессор Догдурбек Чонтоев жана Шаньдун университетинин ректору, академик Ли Шуцай кол коюшту.
Аталган Борбор Борбор Азиядагы саясат, экономика, гуманитардык жана технология жаатындагы биринчи биргелешкен изилдөө платформасы болуп, ШКУга мүчө мамлекеттер үчүн жогорку квалификациялуу кадрларды даярдоого көмөктөшөт.
Борбор Жусуп Баласагын атындагы Кыргыз улуттук университети менен Кытайдын Шаньдун университетинин базасында иштейт. Анын максаттарына биргелешкен илимий долбоорлорду жүргүзүү, конференцияларды уюштуруу, студенттер менен окумуштууларды алмашуу, биргелешкен билим берүү программаларын ишке ашыруу кирет.
Борбордун ачылышы Кыргызстандын президенти Садыр Жапаровдун катышуусунда 31-августтан 3-сентябрга чейин Тяньцзинь шаарында өтө турган ШКУнун 25-юбилейлик саммитине карата күтүлүүдө. Саммитти Кытай Эл Республикасынын Төрагасы Си Цзиньпин жетектейт.
Биргелешкен борбордун ишмердүүлүгү Кыргызстан менен Кытайдын билим берүү тармагындагы өкмөттөр аралык келишим менен жөнгө салынат.
(С) Апаева Софья — Кыргыз-кытай илим-изилдоо институтунун директору
