2026 жылдын 27-март күнү Жусуп Баласагын атындагы Кыргыз улуттук университетинин «Бозжол» философиялык изилдөө борборунда «Кыргыз философиялык ой жүгүртүүсү: концептуалдык негиздери жана келечекке горизонттору» долбоорунун алкагында «Чай үстүндө китеп талкуу» аттуу интеллектуалдык иш-чара ийгиликтүү өткөрүлдү.
Талкуунун борборунда Бенедикт Андерсондун дүйнөгө белгилүү «Элестеги коомчулуктар» (Imagined Communities, 1983) аттуу эмгеги болду.
Иш-чаранын жүрүшүндө улут жана улутчулдук маселелери заманбап илимий дискурс алкагында кеңири талкууланып, Андерсондун негизги концепциялары терең анализденди. Өзгөчө төмөнкү маселелерге көңүл бурулду:
- улуттун «элестетилген коомчулук» катары түшүндүрүлүшү;
- улуттук аң-сезимдин тарыхый калыптанышы;
- басма капитализмдин (газета, китеп, тил) ролу;
- империялардан улуттук мамлекеттердин пайда болушу;
- карта, санак, музей сыяктуу символдук инструменттердин мааниси;
- улут, өлүм жана эс тутум маселелери.
Талкуу ачык форматта өтүп, активдүү суроо-жооп жана пикир алмашуу менен коштолду.
Докладчы: Арген Кадыров — философия илимдеринин кандидаты, борбордун илимий кызматкери
Иш-чарага академиялык чөйрөнүн өкүлдөрү катышты, алардын ичинде:
- Айдарбек Кочкунов — тарых илимдеринин доктору, профессор
- Токтосунова Адаш — саясат таануу илимдеринин доктору, профессор
- Тимур Надыршин жана Бакай Маратов — Ала-Тоо Эл аралык университетинин окутуучулары
- Элеонора Степовская — УИАнын Философия институтунун илимий кызматкери.
Иш-чара философия, саясат таануу, тарых жана антропология тармагына кызыккан студенттер жана изилдөөчүлөр үчүн маанилүү интеллектуалдык платформа болуп берди.
Кийинки талкуулар үчүн пландалган китептер:
- Арслан Койчиев — «Добул таштык Заратустра»
- Баатырбек Аманалиев — «Кыргыз элинин философиялык ой жүгүртүү тарыхынан» (1963)
- Юк Хуэй — «Пост-Европа» (2025)
- Бруно Латур — «Биз эч качан заманбап болгон эмеспиз»
- Гаятри Спивак — «Эзилгендер сүйлөй алабы?» (1985)
- Саветбек Абдрасулов — «Бозжол — адамдын ыйык жолу…»
- Питер Бергер жана Томас Лукман — «Социальное конструирование реальности».
Бул сериялык талкуулар заманбап философиялык жана коомдук ойлорду терең түшүнүүгө багытталган ачык интеллектуалдык аянтча катары улантылат.
