2026-жылдын 21–22-май күндөрү Компьютердик технологиялар жана жасалма интеллект институту тарабынан «Жасалма интеллект жана киберкоопсуздук: Санариптик мейкиндикти коргоонун жаңы доору» аттуу III Республикалык хакатон өткөрүлдү.
Иш-чара заманбап маалыматтык технологиялар, жасалма интеллект жана маалыматтык коопсуздуктун актуалдуу маселелерин чечүүгө багытталган инновациялык долбоорлорду генерациялоочу фундаменталдык интеллектуалдык аянтчага айланды.
Хакатонго республикабыздын билим берүү мекемелеринен жалпысынан 36 команда катышып, алардын ичинен 8 команда онлайн форматта өз долбоордук чечимдерин жакташты.
22-май күнү командалар өздөрүнүн стартаптары менен программалык продуктуларын сунуштап, компетенттүү калыстар тобу тарабынан 10 баллдык шкала боюнча бааланды. Долбоорлорду анализдөөдө төмөнкүдөй негизги илимий-техникалык критерийлер жетекчиликке алынды:
- долбоордун идеясынын хакатондун белгиленген багыттарына шайкештиги;
- программалык чечимдин оригиналдуулугу жана инновациялык жаңылыгы;
- техникалык чечимдин татаалдыгы жана архитектуралык деңгээли;
- сунушталган долбоордун экономикалык натыйжалуулугу жана реалдуулукка шайкештиги;
- презентациялык материалдардын сапаты жана коргоо деңгээли;
- долбоордун келечектүү өнүгүү потенциалы.
Хакатондун катышуучуларына сертификаттарды, жеңүүчүлөрүнө сыйлыктарды тапшыруу аземи 2026-жылдын 25-майында КУУнун башкы имаратындагы кичи жыйындар залында өткөрүлдү.
Эксперттик комиссиянын кылдат баалоосунун жыйынтыгында, жалпысынан эки багыт боюнча эң жогорку упай топтогон алдыңкы командалар аныкталды.
Мобилдик тиркемелерди иштеп чыгуу багыты:
- 1-орун: “Manas Tigers” командасы (Кыргыз-Түрк Манас Университети) — 30 000 сом (отуз миң сом);
- 2-орун: “ScamSity” командасы (Жусуп Баласагын атындагы Кыргыз улуттук университети) — 20 000 сом (жыйырма миң сом);
- 3-орун: “Asta_team” командасы (Жусуп Баласагын атындагы Кыргыз улуттук университети) — 15 000 сом (он беш миң сом);
- 4-орун: “Kaizen” командасы (Ош мамлекеттик университети) — 10 000 сом (он миң сом).
Веб-технологиялар багыты:
- 1-орун: “CyberTech” командасы (Жусуп Баласагын атындагы Кыргыз улуттук университети) — 30 000 сом (отуз миң сом);
- 2-орун: “Trun Lens” командасы (№99 кесиптик лицей) — 20 000 сом (жыйырма миң сом);
- 3-орун: “ПКС” командасы (Эл аралык Кыргыз-Өзбек университети) — 15 000 сом (он беш миң сом);
- 4-орун: “Kalkan AI” командасы (Жусуп Баласагын атындагы Кыргыз улуттук университети) — 10 000 сом (он миң сом).
Уюштуруу комитети бардык катышуучуларга жигердүүлүгү үчүн терең ыраазычылык билдирет жана жеңүүчүлөрдү инновациялык технологиялык ийгиликтери менен куттуктайт!
Хакатондун жыйынтыгы расмий протокол менен бекитилди.
