2025-жылдын 24-декабрында Жусуп Баласагын атындагы Кыргыз улуттук университетинде биринчи проректор – окуу иштери боюнча проректор Алайбек Шамшиевдин төрагалыгы алдында Туруктуу өнүгүү максаттарын (ТӨМ) ишке ашыруу маселелери боюнча Координациялык кеңештин биринчи отуруму болуп өттү.
Иш-чаранын жүрүшүндө университеттин туруктуу өнүгүү контекстиндеги институционалдык өнүгүүсүн аныктоочу негизги нормативдик жана стратегиялык документтер, атап айтканда, КУУнун ТӨМ маселелери боюнча Координациялык кеңеши жөнүндөгү Жобо жана 2030-жылга чейин «Сапаттуу билим берүү» ТӨМ 4тү ишке киргизүү жөнүндөгү Жобо талкууланды.
КУУда ТӨМдүн ишке ашырылышына мониторинг жүргүзүү жана алардын университеттин QS эл аралык рейтингиндеги позициясына тийгизген таасири жөнүндө университеттин Стратегиялык өнүгүү жана ТӨМдү ишке ашыруу бөлүмүнүн башчысы, экономика илимдеринин доктору, профессор К.А.Токторбаева баяндама жасады. Университеттин институционалдык трансформациясынын артыкчылыктуу багыттарын аныктоого өзгөчө көңүл бурулду, анын ичинде «Жашыл кампус», «Университет 4.0», «Инклюзивдик билим берүү», «Санариптик трансформация» жана «Гендердик теңчилик» демилгелери.
Отурумдун жыйынтыгында Координациялык кеңештин 2025–2026-окуу жылына карата жылдык иш планы бекитилип, ошондой эле КУУнун ТӨМдү ишке ашыруу боюнча саясатын заманбап чакырыктарды эске алуу менен актуалдаштыруу зарылдыгы белгиленди.
