2026-жылдын 18-май күнү «Айгүл-Тоо» тарыхый-маданий музей комплексинде Жусуп Баласагын атындагы Кыргыз улуттук университетинин Баткен аймактык көп тармактуу институту тарабынан Эл аралык музейлер күнүнө арналган салтанаттуу майрамдык иш-чара өткөрүлдү. Маданий жана илимий мааниге ээ болгон бул иш-чара аймактагы тарыхый мурастарды сактоо, музей ишин өнүктүрүү жана жаш муундардын тарыхка болгон кызыгуусун арттыруу максатын көздөдү.
Аталган музей доцент Абдинаби Кадыров жетектеген институт тарыхчыларынын жеке демилгеси менен түзүлүп, азыр чоң тарыхый-маданий музей комплексине айланган.
Иш-чарага институттун директору Абдикайым Жусубалиев баштаган жетекчилер, маданият жана билим берүү тармактарынын өкүлдөрү, коомдук ишмерлер, чакырылган коноктор, окутуучулар, студенттер жана шаар тургундары катышышты. Алар музей комплексиндеги жаңы экспозициялар менен таанышып, аймактын тарыхын, маданиятын жана археологиялык мурастарын чагылдырган баалуу материалдарды көрүп чыгышты.
Майрамдык иш-чаранын жүрүшүндө музейдин сүрөтчүсү жана скульптору Айдаралы Айтматовдун жаңы чыгармачылык эмгегинин расмий таанытымы өткөрүлдү. Автордун эмгеги улуттук баалуулуктарды, тарыхый эстутумду жана руханий мурастарды чагылдырган көркөм композиция катары катышуучулардын өзгөчө кызыгуусун жаратты. Иш-чаранын катышуучулары скульптордун чыгармачылыгына жогору баа берип, анын эмгектери жаштарга мекенчилдик тарбия берүүдө маанилүү орунду ээлерин белгилешти.
Ошондой эле салтанаттын алкагында институттун окумуштуулары жана изилдөөчүлөрү тарабынан жүргүзүлгөн археологиялык казуулардын негизинде табылган тарыхый буюмдардын жана артефакттардын көргөзмөсү уюштурулду. Көргөзмөгө байыркы доорлорго таандык керамикалык сыныктар, тиричилик буюмдары, таш куралдар жана башка археологиялык табылгалар коюлуп, алар аймактын бай тарыхын жана маданий мурасын чагылдырган өзгөчө экспонаттар катары сунушталды.
Иш-чаранын жүрүшүндө музейлердин коомдогу орду, тарыхый эстеликтерди сактоо, илимий изилдөөлөрдү өнүктүрүү жана жаштарды тарыхый аң-сезимге тарбиялоо маселелери тууралуу пикирлер айтылды. Катышуучулар музейлер элдин тарыхын, маданиятын жана руханий дүйнөсүн келечек муундарга жеткирүүчү маанилүү борбор экенин баса белгилешти.
Майрамдык иш-чара чыгармачылык жана илимий чөйрөнүн өкүлдөрүн бириктирген маанилүү маданий аянтча болуп, катышуучуларга тарыхый мурастар менен жакындан таанышууга жана музей ишмердүүлүгүнүн маанисин дагы бир ирет аңдоого мүмкүнчүлүк түздү.
(С) Таиров К.А. – тарых и.к., доцент
