2026-жылдын 19-октябрында Жусуп Баласагын атындагы Кыргыз улуттук университетинин ректору, профессор Догдурбек Чонтоев Түрк маданияты жана мурасы фондунун президенти Актоты Раимкулова менен жолугушту.
Актоты Раимкулова тарабынан демилгеленген жолугушууга ошондой эле КУУнун биринчи проректору — окуу иштери боюнча проректор Алайбек Шамшиев, Эл аралык кызматташуу жана байланыштар департаментинин башчысы Бактыбек Келдибеков, ошондой эле Фонддун протокол кызматынын жетекчиси Аблай Абдраимов жана Бота Наспекова катышты.
Ректор Догдурбек Чонтоев Актоты Раимкулованын КУУга жасаган иш сапарынын маанисин белгилеп, 2024-жылдын 10-сентябрында №338-буйрук менен түзүлгөн Түрк маданияты жана мурасы фонду Борбор Азия элдеринин ортосундагы достук мамилелерди жана өз ара кызматташтыкты чыңдоодо негизги институт экенин баса белгиледи. Ошондой эле университет менен Фонддун ортосундагы биргелешкен демилгелерди колдоого даяр экенин билдирди.
Өз кезегинде Актоты Раимкулова жылуу кабыл алуу үчүн ыраазычылык билдирип, КУУнун базасында түзүлгөн Түрк мурасы борборунун тарыхый-маданий баалуулуктарды изилдөөдөгү жана аларды эл аралык коомчулукка таанытуудагы салымын белгиледи жана келечектеги өнөктөштүктө анын ролу дагы да жогорулай турганын айтты. Ошондой эле аталган Борбордун иш алып буруусунун Жол картасын биргелешип иштеп чыгууну сунуштады.
Жолугушууда биринчи проректор — окуу иштери боюнча проректор Алайбек Шамшиев Улуттук университеттин аймактык түзүмү кеңейип, анын курамына үч облустагы институттар кошулганын маалымдады. Анын айтымында, бул өзгөрүүлөр түрк мурастарын изилдөөгө багытталган илимий иштердин көлөмүн жана мүмкүнчүлүктөрүн кеңейтүүгө өбөлгө түзүүдө. Ошондой эле бир катар перспективдүү долбоорлор сунушталды.
Алардын катарында туризм багыты, археологиялык казууларды жүргүзүү, тарыхый эстеликтерди реставрациялоо, ошондой эле сөздүк түзүү демилгелери бар. Тараптар сунушталган долбоорлорду биргелешип ишке ашыруу жана мындан аркы өнөктөштүктү активдештирүү боюнча макулдашышты.
