Урматтуу окутуучулар, кызматкерлер, студенттер, магистранттар, аспиранттар жана бүтүрүүчүлөр!
Сиздерди 31-май — Жусуп Баласагын атындагы Кыргыз улуттук университетинин күнү менен чын жүрөктөн куттуктайм!
Бул күн — университетибиздин тарыхын, жетишкендиктерин жана келечекке болгон умтулуусун даңазалаган өзгөчө майрам. Көп жылдык тарыхка ээ болгон окуу жайыбыз өлкөбүздүн билим берүү, илим жана маданият тармактарынын өнүгүшүнө зор салым кошуп, Кыргызстандын интеллектуалдык потенциалын калыптандырууда маанилүү роль ойноп келет. Университеттен билим алып чыккан миңдеген бүтүрүүчүлөр бүгүн мамлекеттик башкарууда, илимде, билим берүүдө, экономикада, маданиятта жана коомдук турмуштун бардык тармактарында ийгиликтүү эмгектенип, мамлекетибиздин өнүгүшүнө өз салымдарын кошуп жатышат.
Бүгүнкү күндө университетибиз заманбап талаптарга жооп берген билим берүү борбору катары өнүгүп, дүйнөлүк билим берүү мейкиндигине интеграцияланып, жаңы билим берүү технологияларын жана илимий изилдөөлөрдү ийгиликтүү ишке ашырууда. Бул жетишкендиктердин артында ар бир окутуучунун түйшүктүү эмгеги, ар бир кызматкердин жоопкерчилиги жана ар бир студенттин билимге болгон умтулуусу турат.
Урматтуу профессордук-окутуучулук курам!
Сиздер жаш муундарды тарбиялап, аларга билим гана эмес, адамгерчилик, мекенчилдик жана жоопкерчилик сыяктуу асыл сапаттарды да сиңирип келе жатасыздар. Сиздердин кесипкөйлүгүңүздөр, тажрыйбаңыздар жана талыкпас эмгегиңиздер университетибиздин кадыр-баркын көтөрүп, анын өнүгүүсүнө бекем негиз түзүүдө. Ар дайым чыгармачылык изденүүдө болуп, жаңы илимий ийгиликтерди жарата беришиңиздерге тилектешмин.
Урматтуу кызматкерлер!
Университеттин үзгүлтүксүз иштешинде жана өнүгүшүндө сиздердин эмгегиңиздер өзгөчө мааниге ээ. Сиздердин жоопкерчиликтүү жана ак ниет эмгегиңиздер билим берүү процессинин сапаттуу уюштурулушуна өбөлгө түзүп келет. Ар бириңиздерге терең ыраазычылык билдирем.
Урматтуу студенттер!
Сиздер — университетибиздин сыймыгы жана өлкөбүздүн келечегисиздер. Билимге болгон умтулууңуздар, чыгармачылык демилгелериңиздер жана активдүү жарандык позицияңыздар менен мамлекетибиздин өнүгүшүнө салым кошо турган мыкты адистер болуп жетилериңиздерге ишенем. Университетте алган билимиңиздер жана тажрыйбаңыздар алдыдагы чоң ийгиликтердин бекем пайдубалы болсун.
Университет күнү — бул жетишкендиктерди жыйынтыктап гана тим болбостон, жаңы максаттарды аныктап, келечекке ишенимдүү кадам таштоого үндөгөн майрам. Биз мындан ары да билим берүүнүн сапатын жогорулатып, илимий потенциалыбызды чыңдап, эл аралык кызматташтыкты кеңейтүү аркылуу университетибиздин аброюн дагы бийик деңгээлге көтөрүү үчүн биргелешип аракет кыла беребиз.
Ушул майрам күнү жалпы жамаатка бекем ден соолук, үй-бүлөлүк бакыт-таалай, ынтымак, чыгармачылык дем, илимий жана кесиптик ийгиликтерди каалайм. Студенттерибизге окуудагы ийгиликтерди, бийик максаттарды жана жаркын келечекти тилейм. Университетибиздин даңкы артып, жетишкендиктери дагы да көбөйө берсин!
Жусуп Баласагын атындагы Кыргыз улуттук университетинин күнү кут болсун!
Терең урматтоо менен,
Жусуп Баласагын атындагы Кыргыз улуттук университетинин ректору,
география илимдеринин доктору,профессор Чонтоев Д.Т.
30.05.2026