2025-жылдын 23-апрелинде экономиканын жогорку мектеби, жаштар саясаты жана спорт департаменти жана ИИМге караштуу баңгизаттардын мыйзамсыз жүгүртүлүшүнө каршы күрөшүү кызматы (БМЖККК) биргеликте уюштурган иш-чара болуп өттү.
Иш-чаранын максаты – студенттерге баңгизаттарга байланыштуу тобокелчиликтер тууралуу маалымат берүү, укуктук маданиятты калыптандыруу жана жеке, коомдук коопсуздук маселелерине жоопкерчиликтүү мамилени өнүктүрүү болду.
Иш-чарага төмөнкү коноктор катышып, өз ойлору менен бөлүшүштү:
- Сагымбаева Тинатин Азаматовна – Республикалык психиатрия жана наркология борборунун жашы жете элек балдарга медико-психологиялык жардам берүү бөлүмүнүн башчысы;
- Исматова Умида Алимжановна – милициянын подполковниги, ИИМдин БМЖКККнын өзгөчө маанидеги иштер боюнча ыйгарым укуктуу кызматкери.
БМЖКККнын кызматкерлери шарттуу мыйзам бузгандарды кармоо боюнча көрсөтмө иш-аракеттерди өткөрүп, баңгизат коркунучуна каршы күрөшүүдө колдонулуучу заманбап техникалык каражаттарды көрсөтүштү жана өз иш тажрыйбаларынан реалдуу окуяларды айтып беришти.
Студенттер бул иш-чарага чоң кызыгуу менен катышып, активдүү талкууларга аралашып, суроолорду беришти.
Экономиканын жогорку мектеби, жаштар саясаты жана спорт департаменти мындай жолугушуулар жаштарды тарбиялоодо абдан маанилүү элемент деп эсептейт. Алар аң-сезимдүү, жоопкерчиликтүү жаш муунду тарбиялоого жардам берет.
Иш-чаранын өзгөчө активдүү катышуучулары БМЖККК кызматкерлери тарабынан баалуу белектер менен сыйланышты, бул болсо мазмундуу жана пайдалуу жолугушуунун жагымдуу жыйынтыгы болду.
(С) Назира Сулайманова – экономиканын жогорку мектебинин башкы адиси
