2025-жылдын 3-апрелинде Жусуп Баласагын атындагы Кыргыз улуттук университетинин 100 жылдык мааракесинин алкагында 2010-жылдагы 7-апрель Элдик революциясынын 15 жылдыгына карата тарых жана чөлкөм таануу институту, социалдык-гуманитардык илимдер институту, компьютердик технологиялар жана жасалма интеллект институту тарабынан биргелешип уюштурулган «7-апрель Элдик революциясы: сабактары жана тарыхый мааниси» аттуу кереге кеңеш болуп өттү.
Иш-чаранын расмий бөлүгүн тарых жана чөлкөм таануу институтунун директору Туратбек Сырдыбаев ачып берди. Андан соң, Кыргыз Республикасынын Баатыры Алиясбек Алымкулов жана “Мурас” фондунун төрагасы Кыяс Молдокасымов сөз сүйлөп, иш-чара мүнөздүү эскерүүлөр жана көркөм тасма менен уланды.
Кеңештин алкагында төмөнкү илимий баяндамалар жасалды:
- Арзыматова Айнура Атыгаевна – тарых илимдеринин доктору, профессор, тарых жана чөлкөм таануу институтунун “Европа жана Америка өлкөлөрүнүн тарыхы” кафедрасынын башчысы: «Революциялар Кыргызстанда: терминология маселеси тууралуу»;
- Кубатова Аида Эсенкуловна – тарых илимдеринин кандидаты, УИАнын Б. Жамгерчинов атындагы тарых, археология жана этнология институтунун бөлүм башчысы: «2010-жылдагы Апрель революциясы: версиялар жана фактылар»;
- Бабашев Алтынбек Курманбаевич – философия илимдеринин кандидаты, доцент: «Улуттук идеология жана революция феномени»;
- Тостокова Кенже Абдуаримовна – ага окутуучу: «Педагог жана изилдөөчү Кудайбергенов Ж.Т.».
Иш-чарага уюштуруучу институттардын профессордук-окутуучулук жамааты, студенттер, изилдөөчүлөр жана ар түрдүү тармактардан келген коноктор катышты.
(С) Айдар Шейшенов – тарых жана чөлкөм таануу институтунун директорунун орун басары
