Жусуп Баласагын атындагы Кыргыз улуттук университети эл аралык кызматташтыкты бекемдөө жана билим берүүнүн сапатын жогорулатуу максатында студенттерди сырткы академиялык мобилдүүлүк программасы боюнча окутууга жөнөтүүнү улантууда.
2026-жылдын 26-март күнү КУУнун Академиялык мобилдүүлүк, билим берүү экспорту жана тармактын магистратура бөлүмү тарабынан Юридика институтунун «Бажы иши» адистигинде билим алган 2-курстун 11 студенти Алматы шаарындагы Д.А.Кунаев атындагы Евразиялык юридикалык академиясына кыска мөөнөттүү мобилдүүлүк окутуу программасына жөнөтүлдү. Программа 7-апрелге чейин улантылат.
Бул иш-чара Ж.Баласагын атындагы КУУ менен Д.А.Кунаев атындагы университеттин ортосундагы эки тараптуу келишимдин алкагында аталган бөлүмдүн башчысы С.Н.Шерматованын жана Укук таануу жана бажы иши кафедрасынын башчысы Р.Т.Ибраимовдун биргелешкен иш-аракетинин натыйжасында ишке ашууда.
Программанын негизги максаттары:
- Тажрыйба алмашуу: Эки өлкөнүн бажы мыйзамдарын жана эл аралык соода эрежелерин салыштырмалуу изилдөө;
- Квалификацияны жогорулатуу: Коңшу мамлекеттин алдыңкы окутуучуларынан лекцияларды угуу жана заманбап бажы технологиялары менен таанышуу;
- Эл аралык байланыш: Студенттер арасындагы достукту чыңдоо жана келечектеги кесиптик кызматташтыкка негиз түзүү.
Окуунун жыйынтыгында студенттер тиешелүү сертификаттарга ээ болуп, алган билимдерин өз мекенинде бажы тармагын өнүктүрүүгө жумшашмакчы. Академиялык мобилдүүлүк – бул студенттер үчүн башка өлкөнүн билим берүү системасы менен таанышууга гана эмес, өз адистиги боюнча эл аралык деңгээлдеги көз карашты калыптандырууга берилген чоң мүмкүнчүлүк болуп саналат.
(С) Р.Т.Ибраимов — укук таануу жана бажы иши кафедрасынын башчысы
