2026-жылдын 1-октябрында Жусуп Баласагын атындагы Кыргыз улуттук университетинде «Улуу Алтай» өкүлчүлүк борборунун алкагында өткөрүлгөн эл аралык методикалык семинар жыйынтыкталды.
Эки этаптан турган семинар 11–13-майда жана 9–10-сентябрда жогорку окуу жайлардын окутуучулары жана жалпы билим берүүчү мектептердин мугалимдери үчүн тарых жана регион таануу багыттары боюнча уюштурулган.
Иш-чара Кыргыз Республикасынын Илим, жогорку билим берүү жана инновациялар министрлиги, Россия Федерациясынын Илим жана жогорку билим берүү министрлиги, Алтай мамлекеттик университетинин «Улуу Алтай» алтаистика жана түркология боюнча илимий-билим берүү борбору жана Жусуп Баласагын атындагы Кыргыз улуттук университетинин «Улуу Алтай» өкүлчүлүк борбору тарабынан биргеликте уюштурулду.
Эл аралык методикалык семинар «Улуу Алтайдагы түрк элдеринин тарыхый-маданий мурасы: изилдөөнүн жана жаш муунга жеткирүүнүн заманбап тенденциялары» деген темага арналды. Жалпы көлөмү 72 саатты түзгөн семинардын негизги максаты — тарых жана регион таануу багыттарында билим берүү процессинин сапатын жогорулатуу, илимий изилдөөлөрдүн жыйынтыктарын мугалимдерге жана жаш муундарга жеткирүүнүн натыйжалуу жолдорун талкуулоо жана заманбап методикалык ыкмаларды жайылтуу болду.
Иш-чаранын жүрүшүндө семинардын катышуучуларына Алтай мамлекеттик университетинин эл аралык байланыштар боюнча проректору Роман Райкин жана Алтай мамлекеттик университетинин «Кең Алтай» алтаистика жана түркология борборунун директору, тарых илимдеринин доктору, профессор Юлия Лысенко сертификат-дипломдорду тапшырышты.
Жыйындын соңунда КУУнун Тарых жана чөлкөм таануу институтунун директору Алымбек Кушубеков менен «Кең Алтай» алтаистика жана түркология өкүлчүлүк борборунун директору Жамыйкат Омурова сөз сүйлөшүп, илимий-билим берүү багытындагы кызматташтыкты мындан ары да өнүктүрүүнүн, тажрыйба алмашууну улантуунун жана биргелешкен долбоорлорду ишке ашыруунун маанилүүлүгүн белгилешти.
