2022-жылдын 2-июнь күнү башкы имараттагы кичи жыйындар залында көрүнүктүү тарыхчы, илимпоз, педагог, тарых илимдеринин доктору, профессор Жаныбек Жакыпбекович Жакыпбековдун 75 жылдык мааракесине арналган “Кыргызстандын тарыхынын жана тарыхнаамасынын актуалдуу маселелери” аттуу эл аралык илимий-практикалык конференция болду. Иш чарага Кыргыз-Түрк “Манас” университетинин, И.Арабаев атындагы КМУнун, К.Карасаев атындагы БМУнун, УИАнын өкүлдөрү жана юбилярдын туугандары катышты. Жыйынды тарых жана чөлкөм таануу факультетинин деканы Туратбек Сырдыбаев ачып, окуу иштери боюнча проректор Бекжан Темиров куттуктоо сөзүн айтты.

Юбилярды 75 жашка толушу менен менен о.э. Кыргыз-Түрк "Манас" университетинин профессору Анварбек Мокоев, И.Арабаев атындагы Кыргыз мамлекеттик университетинин проректору Нурмамат Эсенкулов баштаган окуу жайдын тарыхчылары, КУУнун 2011-2014-жылдардагы ректору Искендер Исамидинов, К.Карасаев атындагы Бишкек мамлекеттик университетинин профессору Дөөлөтбек Сапаралиев, Улуттук илимдер академиясынан А.З.Жапаров, С.Дүйшембиев, Р.Жолдошев, о.э. КУУнун тарых жана чөлкөм таануу факультетинин жамааты куттукташты.

Чыгып сүйлөгөндөр Жаныбек Жакыпбековичтин илимий-педагогикалык ишмердиги тууралуу баалуу ойлорду айтышып, Кыргызстандын байыркы жана орто кылымдардагы тарыхын изилдөөдөгү жаңы көз караштар, Кыргызстандагы археологиялык жана этнологиялык изилдөөлөрдүн жаңылыктары, булактаануучулук жана тарыхнаамалык багыттагы изденүүлөр тууралуу билдирүүлөрдү жасашты.

Илимий конференциянын жыйынтыгында кабыл алынган резолюцияда окумуштуу Ж.Ж.Жакыпбековдун жана башка өрнөктүү инсандардын басып өткөн жолун жана ишмердигин кеңири пропагандалоонун, ошондой эле окуп үйрөнүүнүн зарылдыгы белгиленди.

Кыскача маалымат

Жакыпбеков Жаныбек Жакыпбекович 1946-ж. Чүй областынын Панфилов районунун Кум-Арык айылында туулган.

1963-ж. орто мектепти аяктаган соң, 1964-1966-жылдары Фрунзе шаарындагы Ленин атындагы заводдо жумушчу болуп иштеген. Андан кийин, 1967-ж. Кыргыз мамлекеттик университетинин тарых факультетине өтүп, 1972-жылы артыкчылык диплому менен аяктаган. 1972-1974-жылдары Германияда Советтик армиянын катарында офицердик кызматты өтөгөн. 1974-жылдан Кыргыз мамлекеттик университетинин СССРдин тарыхы кафедрасынын ага лаборанты болуп эмгектенген. Ошол эле учурда СССРдин тарыхы кафедрасынын окутуучусу кызматын айкалыштырып иштеп, 1975-1986-жылдары СССРдин тарыхы кафедрасынын окутуучусу, 1987-жылы Совет мезгилине чейинки СССРдин тарыхы кафедрасынын ага окутуучусу, 1992-жылдан – 1993-жылга чейин ошол эле кафедранын доценти, 1993-жылдан – 2000-жылга чейин Түркстан, Россия, Кавказ элдеринин тарыхы кафедрасынын доценти, 2000-жылы Азия жана Африка өлкөлөрүнүн тарыхы кафедрасынын профессору, 2001-2016-жылдары Байыркы жана орто кылымдардагы Кыргызстандын тарыхы кафедрасынын кафедра башчысы, 2016-жылдан бүгүнкү күнгө чейин Кыргызстандын тарыхы кафедрасынын профессору кызматын аркалап келет.

1978-1982-жылдары Кыргыз мамлекеттик университетинин аспирантурасын сырттан окуп, 1986-жылы М.В. Ломоносов атындагы Москва мамлекеттик университетинде кандидаттык диссертациясын коргоп, тарых илимдеринин кандидаты, ал эми 2013-жылы докторлук диссертацияны коргоп, тарых илимдеринин доктору илимий даражаларын алган.

Окумуштуу учурда 140тан ашуун илимий макалаларды, алардын ичинен 2 монографиялык изилдөөнү, 4 окуу-методикалык эмгекти жарыялаган. Бүгүнкү күндө, Кыргызстандын тарыхынын актуалдуу маселелери “Кыргызстандын тарыхынын булактаануусу”, “Кыргызстандын тарыхы илиминин тарыхнаамасы”, “Тарых илимдеринин тарыхы жана методологиясы” аттуу программалардын автору жана “Кыргызстандын тарыхы” ж.б. профилдик предметтер боюнча курстарды иштеп чыгып, лекцияларды окуп келет.

Илимий-педагогикалык ишмердүүлүгүндө жетишкен ийгиликтери үчүн 1997-ж. Кыргыз Республикасынын билим берүү жана илим министрлигинин “Билим берүүнүн мыктысы” төш белгиси, 2001-ж. КР билим берүү жана маданият министрлигинин Ардак грамотасы, 2015-ж. КУУнун ардагери, 2021-ж. Кыргыз Республикасынын аялдар Конгрессинин Ардак грамотасы менен сыйланган.